Pawisa awm leh awm lo inhnialna
Tunlaia Mizoram politics khawvel inhnialna ninawm tak chu pawisa a awm tih leh pawisa a awm lo tih thua inhnialna hi a ni.
Mizoram sorkar hian Covid hripui avanga pawisa awm lo hi chhuanlam remchang takah hian a hmang kual char char tawh a nih laiin pawisa tamzia leh chumi khamiah phullem siam, airport chei, office tur sakna lungphum phum, hall sak, auditorium sak etc hi an la sawi bawk a. Hemi khaikhawmna chu 'CONSTRUCTION' a nih chuan pawisa a awm zel tih a ni thei tlat a ni.
Mizoramah hian (MNF sorkar chauh ni lovin sorkar awm tawh zawng zawng) kan politician 50% aia tam hi hnathawh mumal nei si lo, eizawnna kawh tur fumfe nei lo an ni tlangpui a ni. Heng mite innghahna ber chu kan party hi sorkar ve hlauh se, chumi zar chu zo ila, contract leh supply ka hmu ve ang a, kan sorkar chhungin kan chhungkaw dinhmun ka chawi kang ve hman ang tih hi a ni.
Mizorama kan ruling MLA zawng zawng deuhthaw hian (an zavai chu a ni bik lo) an bial chhunga contract hna thawhah hian ei neih an tum ve zel an ti. Hei hi chu tun hnaiah pawh a rawn ri chhuak ta nge nge a nih kha mawle!
Contractor-in kawngpui an siam ang a, hall an sa ang a, building an sa anga mahse MLA or Minister tu tu emaw khan ei an neih ve zel chuan a hna a ṭha thei lo.
Hei vang hian a nia Covid dona atan sorkar hnathawk pawisa an 'PUK' hial a, hlawh pawh an pe 'TLAI' tawh chung pawhin construction tur thil a nih chuan pawisa hi a awm zel tho.
Construction hi politician tam tak eizawnna a ni tel tih hi chu thil hrethiam phak chin chuan an hria. Vai Consultancy Firm hmanga hna pe zawih zawih hi chuan mahni party office an thlim tihna a la ni zui an ti a, pawisa chu construction-ah a awm a, nakinah tu tute ipte ah nge a awm dawn tih pawh lo inringsiak ve teh ang u.
- Rintea