Farewell Obama

Kum 2004 a Senator atana thlan tlin leh kum 2008 leh 2012 a khawvela hna hautak ber zinga an sawi ṭhin, United States of America President dinhmun chelh tura America mipuiten an thlan tlin, a thusawi ropui leh ril tak takte avanga American ṭhalaite ngaihsan rawn, Barack Obama chuan US President a nih chhunga a tawpna atan kum 2004 a politics khawvel a luhchilh theihna tura kawngka hawnsaktu, Senate member-a thlan tlin a nihna Chicago khawpuiah ngei mai thlahna thuchah (farewell message) chu 10th February, 2016 (Thawhlehni) khan a sawi ta. A dan pangngaiin a ṭawngkam chhuak ṭhenkhatte chu American chu sawi loh, khawvel letliama television-a lo thlirtu tam takte thinlunga cham hlen tur a awm leh nual mai!

An President ngainat hun hnuhnung hmanpui a, thlah tura lo kal mi 18,000 chuangte pawh standing ovation pe reng rengin a thusawi chhung kha chuan hun an hmang tluan deuh thaw tih a lo thlir ve te chuan kan hre awm e. 20th January, 2016 a President-elect, Donald J. Trump hnena a lalṭhutthleng hlan tawh mai tur a ni a. Chutih rualin, minute sawmthum emaw lek chhunga President Obama thuchah hnuhnung aṭang khan chhenfakawm zual nia ka hriatte ka han tarlang ve reng reng teh ang.

President Obama chuan, “Politics chu a nihna takah chuan thluak/ngaihtuahna hmanga inbeihna/ indona (battle of ideas) a ni a, chu chu democracy kalphung reng a ni. Chu indona chu indona dang nen a inang lo. Keinin ngaihtuahna ṭha tak tak kan neih ang bawkin kan bitumte pawhin ngaihtuahna ṭha leh ropui tak tak an nei ve tho. Ram tana ṭha tur a nih chuan an ngaihtuahna (idea) chu kan hmang ṭangkai mai tur a ni. Kan hman ṭangkai sak duh lo a nih chuan chung idea ropui tak takte chuan min kal pel mai dawn tho va, ramin hma a sawn thei ngai lovang,” tiin a sawi. A thusawi dikna tilangtu pakhat chu kum 2008 inthlan dawna Democratic party presidential candidate nih inchuha a elpui ber, Senator Hillary Clinton, President a nih hnua cabinet portfolio pawimawh tak, Secretary of State atana a ruat kha a ni. Kan ram politics hian he a thusawi tawi te-ah hian zir tur kan nei em le?

President Obama chuan racism leh corrup­tion chungchang pawh sawilangin, zawhna pawimawh tak leh ngaihtuahna ti thui tak mai, “Mi ṭhenkhatte aia American bika inngaite leh in dah chungnungte hian democracy ruhrel an tinghing a. Tin, kan political system zawng zawng corrupt veka ngai leh puh a, mahni ṭhut hmun aṭanga keimahni thlan tlin ram hruaitute dem leh puhchhetute hian an sawisel hruaitute thlan tlin kawnga an tel ve na leh an mawhphurhna hi an ngaihtuah ngai em?” tiin America mipuite chu a zawt a ni. Mizoram pawhin nakkum maiah khian kan hruaitu turte kan thlang leh tawh dawn. Kan ram hruaitute leh a thlang tlingtu mipuiten President Obama thusawi hi darthlalangah hmang a, chiang taka in enfiah nan hmang ila a va duhawm em.

Racism chungchang a sawi paha President-elect Donald Trump, a campaign auhlaa America rama Muslim-te luh khap tura intiam khen nana Muslim-te a pawng a taka a huat loh thu a’n zep tel zeuh khan lawm a hlawh hle a nih kha. Politician ṭha chu mi cheng dek thiam leh palai thiam, a tawi zawngin diplomat ṭha tak a nih tel a ngai tlat a ni. Chutiang ni thei tur chuan politics a thawh (khel lovin thawk se!) thiam - political diplomacy a thiam a ngai bawk. Kan politician rualte leh an thachhang dawltu turte zingah hian ‘diplomatic politician’ ṭha tak hi mi eng zah nge kan neih a, eng zah nge hun lo kal tura lo chawr chhuak tura beiseiawm kan neih le?

Ram sum leh pai chungchang (economic issues) a sawinaah President Obama chuan, “Ram hausakna leh sum leh pai dinhmun chungchang zawng zawng hi rim taka hna thawk ṭhin middle class-te leh an lak luh phu lova hausa te inbeihna chungchang ringawt sawina a nih chuan, chung mite, rim leh hah taka hnathawktute chuan an lak luh phu lova hausate hausakna chuang liam tlem te chu an inchuh reng mai dawn tihna a ni,” tiin a sawi. He a thusawi hi chu a practical-in a khal ṭha telh tawlh hlein ka hria. Mizote hi a sawia sawi lamah chuan kan chak viau. Social media forum hrang hrangah te pawh thu hrang hrang hi kan khel peih viau. Corruption chungchang, zu chungchang, sawrkar ṭha chungchang etc. Chutih rualin, thua sawi piah lama a thawha thawh leh a tiha tih hlawhtlin zawk chi erawh a awm. Chumi tih hlawhtlin kan tumna kawngah chuan hlawhchham chang te pawh a awm ngei dawn a ni tih President Obama vek hian ti hian a sawi. “Ram inrelbawl dan kalphung (system) avangin a chang chuan in hlawhtling ang a, a chang chuan in hlawhchham bawk ang. Mahse, in tuma in chian a, nghet taka in din tlat phawt chuan eng system mahin a tichhe hlen lovang che u.” Ram veitu leh siam ṭhat duhtu tak takte tan chuan bulṭanna innghahna lungphuma hman tlak a niin ka hria.

A thusawi dang ṭha tak tak pawh la awm nual mah se, a sei lutuk loh nan, a nupui Michelle Obama, “Kum 25 chhung kha ka nupui i ni mai lova, ka ṭhian ṭha ber i ni,” tia a sawi te, a thachhang dawltu ber Vice President Joe Biden, “Ka unaupa (my brother),” tia America mipuite hmaa a sawi te kha hriat a nuam ve hrim hrim.

Awle, President Obama hian khawvela office thiltithei leh ropui bera mi tam takin an ngaih, US President office kum riat a luah chhung khan hnuhma ropui tak tak a hnutchhiah a. A healthcare policy (Obamacare) te, President George W. Bush hunlaia America-in sum harsatna nasa tak a tawh, chumi khaichhuahna tur American Recovery and Reinvestment Act, 2009, Stimulus Package tia an sawi bawk a kalpui te, Iran Nuclear Deal ziah a nih theihna kawnga a hmalakna te, climate change chungchanga khawvel ram dang hruaitu liante nena an hmalakna leh chumi rahchhuah Paris Accord te, Iraq aṭanga US sipai hnuhkir te, American automobile industry ṭhenkhat sum neih loh avanga tluchhe mai tur a tundin leh te, Cuba nena US inlaichinna siam ṭhat kawnga a hmalakna te, global terrorism do kawnga a hmalakna te, Middle East buaina chin fel dan kawng zawnga a beihna te, US-Russo-Chinese inlaichinna tih ṭhat kawnga hma a lakna te leh kawng dang tam tak sawi tur a awm.

Chutih rualin Obama hian hlawhchhamna hrang hrang a nei ve. A intiamna anga Guan­tanamo Bay a khar theih loh te, ram leh ram insumdawn tawnna kawnga agreement pawi­mawh tak Trans-Pacific Partnership (TTP), a nih tur ang ni zo ta lo te, Libya tualchhung buaina chinfel kawnga a hmalakna beisei pha ta lo te, America mipui 70% chuangin an thlawp lo chunga Afghanistan rama sipai a thawn luh belh te, US a hnathawh tur nei lo (unemployed) chungchanga a hmalakna leh a dang te pawh a awm ve bawk.

Eng pawh chu nise, a thil tih ṭhat leh sawisel a kaina zawng zawngte nen US President 44 na, Barack Hussein Obama chu khawvelin a mangṭha a lo ngai ta a. A thuchah hnuhnunga a tawp kharna leh America mipuite hnena President nia a thu chah hnuhnung ber hi i ngaihtuah zui teh ang. “In President ka nih chhunga a tawp ber atana ka chah duh leh ngen duh che u chu President ka nih ṭan tirha ka ngenna tho che u kha a ni. Danglamna (change) hi thlen tir theih a ni tih ring ula, ka theihnaa ka thlentir ni lovin, nangmahni theihnaa thlen tir theih a ni tih hi.” ‘Yes we can, Yes, we did.’

- Zarzosanga