Khua leh tui ṭha ni hmasa ila!

Chhungkuaa pa ber leh nu berin kawng engkima an chhungkaw ṭhat nan theih tawp chhuahin ṭan la mah se an fate an fel loh viau chuan mite entawntlak tak an ni chuang lo. Mi­dangte entawn tlak ni tur chuan chhungkaw ṭangrual nih a ngai.

Chutiang chiah chuan ramin hma a sawn a, a chhunga chengte rualkhai taka hmasawn kan duh chuan sorkar leh a ram mipuite hi kan ṭanrual a, kan inlungrual a ngai.

Eng anga hruaitu ṭha leh sorkar ṭha pawh nei mah ila, a ram mipuiten hruaitute kan thawhpui ṭhat loh chuan hma kan sawn thei lo ang. Ram hruaitute leh mipuite kan in mawhpuh tawn reng chuan hma­sawnna dik a awm thei ngai lo ang.

Hrisel ṭha taka kan awm reng theih nan chuan kan taksa peng hrang hrangte hi an thawh ho ṭhat a, an ṭanrual a ngai. Chutiang anga sorkar leh keini a ram mipuite kan inthurual tlan theih nan chuan Zoram mipui te hian tih tur leh thawh tur, hmabak pawimawh tak kan nei tih hi kan hriat a pawimawh hle. Chu kan tih ve tur chu khua leh tui ṭha tak nih tum hi a ni ngei tur a ni.

Ram hruaitute hian anmahni ringawt chuan engkim an ti vek thei lova, mipui tel loin an thawk vek bik thei lo. Mipui ṭawiawmna leh puihnate hi an mamawh ve reng ṭhin tih kan hriat a ṭha. Nang leh kei hian, ram ṭhat theihna tur hian thawh tur leh tih ve tur kan nei a, kan theihna zawnah ṭheuh khua leh tui ṭha tak nih hi kan tih tur pawimawh ber chu a ni.

Khua leh tui ṭha ni tur chuan rinawmna, dikna, taimakna, huaisenna te hi a pawimawh ber a. Heng thil te tel lo hi chuan eng tikah mah nang leh kei hi, khawi hmunah pawh awmin cheng ila, khua leh tui ṭha kan ni thei ngai lovang. Chuvang chuan heng thilte hi kan nunpui reng tur a ni - Mizoram tana khua leh tui ṭha nih kan duh chuan.

He kan ram hian kawng engkimah hma lo sawn se tih kan duh a, he ram ṭhatna tur hi kan vei tak zet a nih chuan, a chhunga cheng a ram mipuite hian tih tur leh thawh ve tur chanvo, khua leh tui ṭha tak nih hi kan tum ve a ngai a ni.

Eng anga hruaitu ropui leh chhuanawm, sawisel bo khawpa mi famkim pawh nei ni ila, a ram mipuiten Zoram tana khua leh tui ṭha tak nih kan tum ve loh chuan, he ram hian hma lam panna kawngah bung thar a kai thei ngai lovang tih hi a chhunga cheng Mizo mipuite hian kan hriat a pawimaw khawp mai. Ṭan rual hi chakna a ni a, ṭan rual loh chu kehdarhna a ni thung.

Chhungkaw ṭang­rual an hausa a, an dingchhuak a, an dingchang ang hian ram leh hnam ṭangrual a, thawkho ṭha apiang hi an dingchangin an hausa mai ṭhin a ni.

- Nawlchunga Chinjah, Siaha