SEDP KAN DAWNG VE DAWN EM? PAWISA SEM TUR NGE, SEDP SEM TUR?

E heu! Zawhna a va tam ta deuh ve. Kum 2018 December ni 15 (Inrinni) khan MNF President Pu Zoramthanga (khatih laia kum 74) chuan Mizoram Larsap hnen aṭanga thutiam la in, Mizoramah sorkarna an chelh tan a nih kha. Sorkarna an chelh aṭangin kum thum (3) leh thla li (4) a lo liam ta! Kum nga (5) term a nih angin inthlan kumah thil tih theih a tam tawh lo nen kum khat awrh chauh MNF Ministry hian ram leh mipui rawngbawlna hun an nei ta a ni. Khawnge an flagship programme SEDP chu a awm tak? Cheng nuai thum (3) chhungkaw tin hnenah hleih nei lova an sem tur an tiam chu khawnge an sem?

Chhungkaw 60,000 tan phawt :

Chhuanlam tur tingin kum 2020 March thla aṭangin India ram chu COVID19 avangin 'total lockdown' a ni chho ta zut mai a. SEDP pawh an kalpui hleih theih loh phah niin, Dy. Chief Minister Pu Tawnluia chuan April ni 30, 2022 khan Bawngkawna MNF mi thar lawmluhnaah a sawi. Kum 3 leh thla 4 a liam meuh chuan kum 2023 inthlante a lo hnai ta uarh mai a, hei kumin budget-ah pawh SEDP pawisa chu dah a lo ni ta nual a, Dy. Chief Minister hian chhungkaw 60,000 hnenah an sem tur thu a puang, chu chu MLA bial 40-ah chhungkaw 1500 zel tuam tura ruahman a ni a, Rs. 50,000/- zelin chhungkaw pakhatah an sem dawn niin a lang. Nakkum kum 2023-2024 budget tharah SEDP pawisa hi dah leh tum a ni a, chu chu nakkum inthlan hmaa sem hman leh an tum niin a lang a, a thawh hnihna (second phase) a ni tawh ang.

Party an thu leh ang :

Tun hnaiah SEDP pawisa hmangin East Lungdar khua leh khaw ṭhen­khatah zirna in tihchangtlun nan thawktu rawih belh an ni a, ka hriat sual loh chuan thawktu lakna kawngah hian Party Block hruaitute an thu hle a ni. (Ka hriat sual palh chuan min ngaidam se) SEDP vaimim chi, bekang leh adt. semna kawngah pawh rorellai party an thu viau.

Heti a nih chuan SEDP rusum thlakna turah hian MLA bial pakhata chhungkaw 1500 thlang chhuak tur hian MNF unit hruaitute kutthlak loh tan chuan beisei a sang dawn lo tih chiang takin a lang. MLA bial pakhatah chhungkaw 1500 hnena Rs. 50,000/- sem a nih ṭheuh chuan ; MLA bial tinah cheng vaibelchhe 7.5 (Rs.75,000,000) sen a ngai dawn tihna a ni. MLA bial 40-ah chuan mipui hnena sem ral tur hi cheng vaibelchhe 300 a tling dawn a ni. Mizoramah sum leng vak pawh a tam phah hle ang, a semtu party hian SEDP hlawhtlinna aia kum 2023 inthlan ngawr ngawr an thlir (target) a nih pawhin, hlawkna chu hmu turah ngai ang.

Bial khata chhungkaw 1500 :

Hei hi a thawh khatna atana an ruahman a a ni a, a thawh hnihnaah hian chhungkaw 1500 tho an ruahman leh a nih chuan tun MNF sorkar hian MLA bial khatah chhungkaw 3000 hnenah SEDP pawisa an sem hman dawn tihna a ni. Mizo pa hisapin hisap ta ila, chhungkaw pakhatah vote 3 zel awm anga chhutin thingtlang lamah chuan vote 15000 te bial pakhath a awm avangin, MLA bial pakhatah chhungkaw 5000 vel chu awm tura ngaih theih a ni. Heti a nih chuan MLA bial tinah SEDP hi chhungkua zaa 60 velah kalpui hman beisei a ni dawn tihna a ni thei ang.

Pawisa dawn leh hmanna tur :

Cheng nuai thum hi chu sawi ri ta lo law law ila, khawvel hripui leng vangin kum hnih chhung chu sorkara hlawh la lo, sorkar zem zen pha lo, in leh lo hmanga sum la lut ve lo leh sundawng lian ni ve phak lote chu kan mangang tawh a ni. Hetih mêk laia Rs. 50,000/- han dawn thut chu hmanna tur mamawhna a tam viau tawh ang, a dawngtu tan pawh lawmawm tak chu a ni ngei awm e. Chutih rualin kuminah lo halin thlai chi thlak vek a ni tawh a, SEDP chuan eng eizawnna thar nge kan kalpui tak ang le.

SEDP Governing Body chuan ruahmanna fel tak an siam tawh chu an ti a, sorkar hian he SEDP hi hlawh­tling tak tak tur hian a duh lo nge tih zawhna lian tak a awm. A pawisa emaw, a dang dang (kind) te pawhin sem dawn ni se kumin kumtir aṭang khan inhrilhriatna (awareness) kalpui a ngai daih tawh. Mahse mipui hi kan bo mep mep hle vek a ni. 'Pawisa an sem dawn...' tih lai chauh hi kan hriata chu a ni mai. Thingtlangah chuan lo leh hmun nghet, ram awl te a la tam, khawpui ngatah phei chuan engtia kalpui tur nge ni dawn ta ang le. Kan va bo tlang ve le!

Tlangkawmna:

Eng pawh ni se, SEDP pawisa chu mipuia an bat a nih tawh angin MNF sorkar hian han sem phawt mai teh se. Inthlannaa tlinna (election oriented) atana an ruahman a nih angin, kum 2023 inthlanna lo awm tur atana tlinna atan pawh an ti leh ngei turah ngai ang. Cheng vaibelchhe tam tak luan liamna tur hi mipuia inzawrhna atan ringawt ni lo, ram leh hnam, mipui harsa zawkte tana leirem an rahna tur atan ni se tih hi kei ka duh leh ṭawngṭaina a ni e.

- Zoa Tlau