Zirna kawnga nu leh pa mawhphurhna
Chanchin Ṭha Luka ziak 2:51-na kan chhiar chuan, mipa naupang ṭhang chho mek Lal Isua Krista awm dan leh khawsak dan, finna a neih chhoh dan te chu a nu Mari chuan a rilruin a vawng reng a, a chhinchhiah reng tih kan hmu.
Mari hian Lal Isua khawsak dan leh mihring a nih anga finna a zir chhoh dan, a che zia leh ṭawngkam te hi a chhinchhiah a; a ṭul phawt chuan a zilhhau fo ang tih kan hmu thiam ang. Heta ṭang ringawt pawh hian kan fate zirtirna kawnga nu leh pate mawhphurhna kan hrethiam nghal awm e.
Pathian thu leh zirna (education) aia pawimawh thil dang hi mihring tan a awm lo ti phawt ang. Kan hriselna te, kan eizawnna leh hma kan sawn chhohna tur zawng zawng innghahna chu thiamna a ni tlat.
Khawvel ngaihsan rawn, Noble Prize dawngtu naupang ber, Malala Yousafzai, Pakistan hmeichhe huaisen chuan, 'Kan hriat reng tur chu - lehkhabu pakhat, naupang pakhat leh zirtirtu pakhat hian khawvel a thlak danglam thei' tiin a sawi.
Kohhran siamṭhatu ropui Martin Luther chuan, 'Sikula ṭhan chuan engkimin hma a sawn ṭhin' a ti daih. Khawvela mi fing ber Solomona chuan, 'Naupang chu a kalna awm kawngah chuan zirtir ula, a upat hun pawhin a thlah lo vang' a ti bawk.
Nu leh pa te hian kan fate hriat chian hi an zirna kawnga kan puih theihna tur hmasa ber a ni. An tui zawng leh an thiam zawng te, an theihna hriat chian te hi kan mawhphurhna a ni.
Kan fate social media hman dan te pawh kan hriatpui a ngai. A tlai tawh hnua buaipui aiin tun aṭanga fing leh taima taka naupang enkawl a finthlak ang.
Keini Nu leh pate hian kan fate hi 'A rilru a chak lo lutuk, lehkha a thiam thei lo, a â lutuk adt' kan sawi fo a, hetiang ṭawngkam, naupang tana inrintawkna hloh thei thil sawi te hi sim ang u. Mi aia rilru chak lo deuh an nih pawhin, 'I ti thei, i thiam dawn lutuk' tia fuih an mamawh zawk. Kan nu leh pate berin min rin loh chuan tuin nge min ring ngam tawh ang le?
Pathian laka kan rochan kan fate enkawl turin keini aia ṭha hi khawvelah an awm lo a. Chu mawhphurhna ropui tak Pathianin min pek chu tihlawhtling turin nu leh pa zawng zawngte hi ruat leh thlan kan ni e.
- Rinfela Zadeng