Moral reform leh Zoram Politician (Ram hruaitu hi a tak takin i duhtui tawh ang u)

Mizoramah hian moral reform kan sawi hian mipui hi siam ṭhat hmasak tum na a lian hle a, hei hi thil dik a nih rualin a aia dik zawk chu ram hruaitu siam ṭhat hi a ni. He mi avang hian kan ram hruaitu hi duhtui tawh ila, 'Ram Hruaitu Duhtui lo' state kan nih chuan kan mipui an dik ngai lovang a, kan ram hi a ding chhuak lovang.

Congress-ah kan beidawng ti tih tawh a, MNF ni se kan hmuh leh hriat angin mumang ramah min chenpui a, eng ruai an la sual chhuak lova kan state a pachhe zual zel. ZPM lam kalphung thar pawh hi ram hruaitu ber an thar loh chuan a thar chuang lovang, hawh u ram hruaitu hi i duhtui ve deuh tawh ang u hmiang.

Hruaitu an pawimawh hmasa

Singapore ram hi tun hma chuan thliarkar pakhat ve mai, eirukna hluar leh ram hausa pawh ni lo a nih vei nen Lee Kuan Yew awm hnuah chuan ram ropui a ni thei tih kan hmu. Singapore-ah chuan tui herh haw (tap water) apiang hi tui in tlak (drinking water) ni thei khawpin an siam tawh a, ram leilung (land) an neih tlem avangin tuipuiah lei an chhungkhat a, lei chu Malaysia aṭang daih daihin an phur lut chungin hmun nuam leh tlawhtu ngah an ni thei - chu chu mipui vang ni lovin hruaitu vang a ni.

India ram sawi ta ila Delhi-in tun hma aṭang Chief Minister an nei reng tawh chungin kum 2015-a Arvind Kejriwal an hotupa a nih hnu khan Delhi chu khawvel hmuhin a thlak danglam thei a ni. Delhi mipui khu an ṭha ta sawt a ni lo, hruaitu ṭha chuan thil a siam dik a, thil dik hnuaiah chuan mipui an dik a, dik loh an hlau a, mipuiin an chanvo dik tak an chang chho mek a ni.

Bihar ṭawpzia leh fiamthuna atana an hman ṭhin chu Chief Minister Nitish Kumar chuan a siam ṭha a. Sorkar sikula zirtirtu mumal lo ṭhin chu nuai khat chuang a lak belh a, doctor te pawh thingtlangah an awmna turah an awm thlap thlap tawh a, mipui ni lovin hruaitu an dik hmasa a ni.

Kan ṭhenawm Hmar Chhak State te mai mai pawh tunah chuan kan chhoh en tawh a, ring lo mi kan tih zawkten ram an hmangaih a, an ei ru lova, sum ringawt an atchilh lo.

Mizoram hruaitute u...

Kan ram hruaitute ka aṭanga kan hriat ngun em em chu 'PAWISA' chungchang a ni. A chang chuan awihawm lo khawpa tam pawisa min sawi khuma kan awih hlei lo a. A chang leh pawisa harsatzia min sawi khum a, sorkar hnathawk hlawh pe thei lovin bill hrang hrang a tang nghek nghuk a, chuti chung chuan a pung awma rulh leh tur project hrang hrang kal puiin tunah hian rulh leh tur loan tam tak tak kan pûk a, nakin kan ngaihtuah lova tuna 'sum' chiah ngaihtuahin kan kal a ni.

Pawisa ngah hmanga state hi siam chi a ni lova, pawisa neih chhun ṭangkai taka hman dika siam chi a ni. Kan state hotute chuan contract hralh ṭhin a nih thu Press hmaah an sawi ta. Kan Minister inlek pawl takte chu pawisaa rinawm lova tlang hriat te an ni a, an lakluhna leh an background en pawha sum thianghlim lo an la ṭhin ang tih rin theih ram hruaitu eng emaw zat kan nei a ni. Tuna kan ram dinhmun hi dawn ve la lung a awi nem mawṭ

Hruaitu rinawm kan lo neih tawh ṭhin. Tunah pawh hian rinawm tak tak kan nei tho ang, mahse a tam zawk hian eizawnna mumal nei lem lovin Politics hmangin ei an zawng a, miin ram hruaitu an nih an hek phah laiin smuggler te nena inthlun zawm ang hiala an puh khawpa pawisa atchilh ram hruaitu kan nei hi kan va han vanduai ve le.

Rilru tina tawp thei lo chu pawisa hmanga lei theihah mipui hi min hmu a, "Cheng chuti zat chu kan sem ang a, kan la hmin em em ang," tih melhin mipui min melh a, mipui chu heti mai hi kan dinhmun a ni si.

Ram hruaitu thar, ngaihtuahna thar nei, tun anga kal duh lo hi kan neih a hun tawh. Chutiang miin ram hruai se tiha sawi lahin a theih loh thu hlir Mizoram politics lama inhmang chin chuan an sawi a, mi state tih theih ang tih ve theih tumna neih miah loh hi a dik lo.

Kan ram hruaitute hian moral reformation an mamawh. An chet dan leh an awm dan an sawia Kohhran phuar hmabak tur takte pawh an zak lem lova, kan hotu lu te chuan pawisa an sawi chhuah chu 'acheivement' ang maia ngaiin kan state chu pawisa lawm huam huam state ah min chhuah titih ta der mai. Myanmar aṭanga kuhva lak luh tawp hleithei lo phenah pawh hian mi chal lang an ṭhu lovang tih tu nge sawi thei leṭ

Moral Reform buaipuitu pawlte pawh hian mipui hi min target tawh lo se, ram hruaitute hi target tawh zawk teh u. Pawisa atchilh hnam, hausa ngaisang leh sum sawi chhuak thei ropuia insawina ramah min chhuah tawh hi, i insiam ṭha ang u.

Ram hruaitu tur chu a tak takin i duhtui tawh ang u. Synod leh MKHC tih angrengin duhthusam (ideal) ram hruaitu quality an han zam duah a, kan ram hruaitu hi a tak tak hian kan duhtui a hun. Khua a tlai zo dawn.

Party party sawi lovin party tin hian kan ram enkawltu tur mi ṭha tak tak (mi dik, sum atchilh mai mai lo) hi min pe tawh rawh u. Ṭhalai kan beidawng mai a nih chuan a mawhphurtu chu an awm ngei ang, ram hruaitute moral reform hi kan mamawh a ni.

- PC Lalduhawma