Hlâwk nan hman tum ila

Mizorama ṭhalai intawhkhawmna lian ber, khawvel pum huap pawha ṭhalai in­tawhkhawmna lian ber zinga mi ni pha tura ngaih KṬP General Conference chu May 5, Ningani zan hian Kolasib-ah ṭan a ni dawn ta. Inkhawmpuia tel zawng zawngte'n hlim leh nuam ti taka an hman a, Pathian rinna leh a hnung zuina kawngah hlâwkna an chan belh vek theih nan duhsakna ka hlàn e.

KṬP General Confe­rence hi a lian tham a, hùháng a ngah a, mi tam takin hriatthiam phâk mai loh leh hriat nghal theih mai loha tisa leh thlarauah hlâwkna an chan tharna a nih rualin, helhtu leh sawiseltu pawh an awm ve nawk zel tho a. A àwm ve tho mai; ṭul ti lo tan chuan ngaimawh tham a ni ve ang.

Kohhran leh a hnuaia péngte hian, KṬP ngei pawh telin sawiselna an tâwk fo a, media lamah pawh hmuh tur a awm fo. Chutianga ti ṭhinte chu hriatthiam ve tho tur a ni a, sawiselnate hi a dik lo tawpte a nih ngawt loh chuan haw mai lo a, dàwl zawh ṭhin a ṭha a; insiamṭhat a ngaihna laiah chuan inenfiah nan leh insiamṭhatna atan hman ṭhin a ṭha khawp mai.

Mi pakhat chuan, "Fa enkawl dan hi fa nei lo zawkte hian an thiam duh khawp a, ram hruai pawh a hruai lotute hian an thiam phian zel. Kohhran inkaih­hruaina sawisel leh ngaihmawh hi kohhran chhunga mite'n an ti khát khawp. Ringtu ṭha chuan thawhlawm pawh a thawh chhan a chiang khawp, a ui ngai lo," a ti. "Kan hlimpui leh kan tuipui inkhawm te, kan incheinate pawh a niang, kan post suau suau ang chu, thu holam leh thlalak mawi lo tak tak post fo ai chuan," a ti leh zel a.

Mi sawisel mai hi a awl a, mahni inen erawh chuan, sawiselna tur tam tak nei ve thote kan ni hlawm ang. Sawisel kan ngaihna te, insiamṭhat kan ngaihna laite a inang lo thei thung. Mizoram chhung mai ni lo, khawvel hmun danga mite kan thlir a, mi tih dante kan hre chiang telh telh a. Chu'ngte hmang chuan kan inteh ṭhin a. Hengte hi a ṭha - hnam dangte nen inteh a, inkhaikhin a ṭul ve ṭhin.

Chutih rualin, ram/hnam hrang hrangin chìn ṭhan te, tih dan bik te, ngaih pawimawh bikte kan nei vek mai. Chuvang chuan, hnam dangte nen kan inteh a, kan inkhaikhin a nih pawhin, keimahni hi kan inhriatthiam ve a ngai. Chuti a nih loh chuan mi nun dan, tih dan leh chêt dan avangin kan intihah lutuk ang tihte a hlauhawm.

KṬP inkhawmpui lian ngei pawh sawiselna tur zawng tan chuan hmuh tur a awm nual ang; fak duh tan pawh fakna tur a tam ang. Kohhran leh KṬP te, kohhran ṭhalai pawl dangte pawh mi ṭha leh sawisel kai lo hlir telna a ni lo a, misual bera kan ngaihte pawh an tel theihna a ni miau mai a.

Inkhawmpuia telte pawhin an thlalak nalh tak takte social media hrang hrangah an dah leh ang a, a kal ve lote hian lo helh viau lo ila; hunpuiah an kal a, thla an la a, an dah ve a ni mai. Hmun danga kalna, awmna leh thil tihnaa thlalakte pawh an dah tho alawm le.

Chutih rualin, in­khawm­puia telte pawhin heheu rilru pu lo leh hlimhlawp atan hmang mai lo a, Pathian rinna, thuawihna, rawng­bawlna leh thil ṭha dang dangah hlâwkna neih tharna leh neih belhna atan hman tum ngei ila a ṭha khawp ang.

- Kezo