Kan ram bmabak

Hmabak kan nei ṭhin, a ṭhen chuan hmabak duhawm tak tak kan nei a, a ṭhenin kan nei lem lo thung. Kan hmabak te hi keimahni thawhrim dan a zir a ni tlangpui. Taima deuh chuan hmabak a nei ṭha ṭhin a, taima lo chuan engmah a nei lo, retheih a hmabak ṭhin.

Mihringte kan taima tlangpui a, thatchhia chu an tam tehchiam lo; mahse, an langsar thung. Chutiang zelin ram pawh hian hmabak a nei a, chu a hmabak chu ram hruaitute zir leh zir loh a ni thei. Ram hruaitute an ṭhat loh chuan ramin engmah beisei tur a nei lo, retheih leh tlakchhiat a ni mai. Hruaitu a ṭhat erawh chuan ram chhete pawh intodelh leh nuam takah an siam vat thei a ni. Hetih lai hian mipuite pawn kan zir a ngai ve hle, ṭanrual loh chuan eng mah a hlawhtling thei lo. Vawiinah kan ram dinhmun thlir pahin eng ang chiah nge kan nih tawh leh la nih dawn, tih sawi dawn teh ang.

Kan dinhmun: Kan ram chu ruahtui tlak ṭhatna ram, eng kim deuh tho mai ṭhat duhna a ni. Mipui 70% dawn vel lai hi lo neia eizawng kan ni a, sawrkarna chang apiangin an ngai pawimawh thei hle. Han thlir thuak chuan loneitute chu intodelh awm tak an ni a, buh leh bal te pawh ei sen loh thar chur chur tawh awm tak an ni. Mahse,a ni miah lo, rethei tak an la ni reng a, buh leh bal pawh thla thum ei vel bak an thar miah lo, sawrkar lam nge mipui lam thiam loh ni ang aw.

Kan sawrkar hrim hrim pawh hi a pachhe hle, a hnathawkte hlawh pek lawk theih loh chang a nei fo mai. Thil mak lutuk phei chu a ni lo, a chhan chu sum han hmuh na tur (Tax lakna tur) a nei ṭha lo tlat. Silchar kawng a pin hlek chuan kan ṭam deuh zel mai a nih hi. Ziak leh chhiar lamah hian kan sang tih loh chu India rama state rethei ber pawl kan nih hmel. Tun hnu hian kawlphetha hi kan thar ve nual a, MW eng emaw zah a ni ve ṭhin.Leilung hausakna pawh hi sawi tur tak tak a awm meuh lo a ni ber mai e.

Tuh rah seng: Ruh rah seng chungchang hi Bible-ah chiang takin kan hmu. Thil dangah pawh hian a dik ṭhin viau. Miin huanah vaimim a tuh chuan ser a seng daih dawn lo, anṭam a tuh chuan anṭam vek a seng dawn. Vawiinah kan ram hruaituten eng nge an tuh ve le, mipuite pawh hian eng nge kan tuh, chik teh ang. Vawiina ram changkang pui pui, state intodelh tak tak kan hmuh te, eng tin nge hetiang dinhmun an lo nih theih le. An awm mai mai a, an duh duh an ti kual a, an lo ding chhuak ta alawm maw le, kan ti thei hauh lovang. An hlawhtlinna phenah hian thil tam tak a in phum ru a ni. Kum tam tak an thawkrim a, an beidawng duh lo a, a tawpah an hlawhtling ta ṭhin a ni.

Siamtu Pathian pawh hian taima na na chu a tawpah mal a sawm nge nge ṭhin. Chuvang chuan retheihna hlawh chhuak lo tura kan ṭan a ngai.

Kan hmabak: Vawiinah kan ramin eng nge hmabak a neih le, mahni ṭheuh han in bih chiang ila. Tanpuina kan dawng a nih chuan a nihna tur takah kan hmang ṭhin em, dawt hmangin sum kan insiam ṭhin em? Kan hna a ṭha tawk em, belhchian a dawl em tih te en let ṭhin ila. Tichuan thil ṭha beisei tur kan nei ve dawn a ni. Sawrkar department hrang hrang ten hmasawnna hna chi hrang hrang kan thawk a, chung te chu a ṭha tawk em nih loh chuan, nakin lawkah a lo lang leh mai dawn a ni.

Ram hruaitute kan va pawimawh em, eng chi nge kan tuh ve le? Kan tuh rah nakin lawkah a lo lang dawn a nia. Kan tuh rah mgeo kan seng leh dawn. Han thlir kual, han thlir kual la, kan hmabak tur awm deuh chu a hriat theih ve a ni.

Aizawlah building lian nah pui pui, motor lah ṭha ber ber chi hlir, kan incheinate pawh man to leh nalh ber ber chi hlir a ni. Kan tun dinhmun han thlir hi chuan Mizote hian kan nihna lo pui anga lan hi kan tum emaw ni chu aw,a tih theih. Eng pawh nise,mahni ṭheuh in en ila, kan ramin hmabak duhawm tak a neih theih nan i harh thar ang u.

- Lalchhandama Colney