'HMANLAI CHUAN MIZO TEN RILRU THIANGHLIM LEH ZE MAWI TAK KAN NEI ṬHIN' TIH CHAUH HI TAWK LO SE!

Mizoram Legisla­tive Assembly kum 50 tlin Diamond Jubilee lawmna puala Zonet Cable TV in speaker hmasa ber Dr. H. Thansanga (89) an kawmna kha ngun takin ka lo ngaithla a.

A zawttu khan zawhna ṭha tak pakhat zawtin, Union Territory kan nih hnua MLA inthlan hmasa ber 1972 kum ama mimalin a hmachhawn dan a zawt a. Kha a chhanna kha ka ngaih­tuahnaah a riak zui reng mai.

1972 Inthlanpui chu Suangpuilawn bialah Mizo Union party ticket a hma­chhawnin; khami ṭuma inthlan hma­chhawn kha candi­date tan a hahdam­thlak hle tih a sawi a. A mimal pawisa Rs 2,000/- a pai ve pawh chu a hmang zo lo nasa mai tih a sawi.

Candidate tana sum senna tur engmah awm lo khan a dinna party mite khan thawhkhawmin, ei leh in thlengin an lo buatsaih a, an ṭanrualna a ṭha awm ngawt mai. Candidate tan khan sum han chelekna tur kha a awm lo reng reng a ni awm e.

Tin, kha bial khaw tin a fannaah khan intiam tir tura nawrna mipui van­tlangah a ri miah lo mai te kha vawiin nena khaikhinin, thu awihawm lo a chang hial dawn awm e.

Khaw pakhatah chuan candidate pakhatin khawtlang tan radio pek a tiam a, intiam tir ve mai an tum ngawt a, radio ngawt lo, vantlang hma­sawnna tur leh chhenfakawm tak din chu a ngaih pawi­mawh zawk tur thu in a chhang tih kan hmu.

Rilru a lian ta ber erawh khatih laia Mizote rilru lo la thiang­­hlimzia kha a ni. Candidate aṭanga mipuiten sum pai thlerhlo an beisei ve lo leh candidate chu an pui tur zawk a nih an thinlunga a chiang em em kha a ropui lai tak chu a ni.

Suangpuilawn bial mai ni lo, bial dangah pawh khatiang kha mipuite sukthlek leh an rilru ni vek awm pawh niin a rin theih.

Awle, kum 50 a lo ral leh chuan kan dinhmun kan hria a, mipui hian kan politician te hi eiru lo thei loin kan siam/ nawr chang a awm ta fo nia sawi a awm. A society anga insiamṭhatna 'moral reformation' pawh pulpit tlang aṭangin a ri tam ta fo mai.

Mizote'n 1972 a rilru thianghlim tak kan put kha eng vanga pu zui thei ta lo nge kan nih tih hi zirchian tham a ni. Thil chiang tak pakhat chu Mizote rilru thianghlim pu a kan khawsak tlanho lai kha a awm ngei a, thui tak chhui dawn ṭul pawh a ni lo.

Min thlahtute anga rilru thianghlim leh dik, pamham lo, Mizo nun zemawi leh ṭha kha kan neih leh zel lohna tur chhan pakhat mah a awm lo a ni. Politics thianghlim lo kan tih te pawh hi a awlsam zawnga thlir chuan kan nun thiang­hlim loh vang a ni!

Kum 50 liam taa Zonun zemawi leh thianghlim nei let leh turin thutiam i la thar leh ang u.

- V. Lalnunthara (Mathara), V. Thanga Street, Dawrpui