Mitthi chaldarah kher kher maw!

Khawvela mihring lo piang chhuak zawng zawngte hian thlarau kan nei tih hi kan ring vek a: chu mihring thlarau chu kum khuaa thi thei tawh lo niin kan ring vek bawk.

Mitthite thlarau khawvel hi hmun hnih a awm a; pakhat chu Pathian ângchhung, hmun nuam sawi hleih theih loh khawpa nuam leh hma­ngaihna ram êng a ni. Pakhat leh chu setana ângchhung, ramhuai ho chenna hmun thim, ṭah leh ha ṭhialna hmun a ni. Mihring kan thih hian chu mi hmun kawii zawk zawk emawah chuan kan kal tur a ni.

Hindu sakhaw betu (vai ho) te chuan thlarau khawvelah eng mah ken theih an neih lohzia entîr nan mitthi chalah tangka thir (coin) an bel ṭhin niin an sawi. A bul a bal hre si lovin Mizo zingah mitthi chal dâra chêng thîr (coin) bel an awm ta zauh zauh va, a zia lo hle.

Hnam fing hmasaa Greek hote pawhin mitthi thlarau leh mitthi khaw thawnthu an nei. Thihna luipui (styx) an tih chu mi damte leh thlarau khawvel hmun nuam inkârah a luang a. Chungah chuan thla­rau sualho an phusa nuaih nuaih reng a. Thlarau khawvel hmun nuama chêng tur chuan chu thihna luipui chu daikai tur a ni: chu lui ṭihbaiawm tak daikai dan chu kawng khat chiah a awm.

Lawnglênga hruai kâi ṭhin mi pakhat lawngpû Caron-a a awm a. Vaukama mitthi thlarau hnenah chuan lawng chuan man tur pawisa (coin) a va dîl a, pawisa a lo pêk chuan thlarau khawvel hmun nuam paradise-ah a hruai mai a. Pawisa pêk tur a neih loh erawh chuan, chu thihna luipui ṭihbaiawmah chuan kum khuaa lungngâia rum turin a hnutchhiah ta mai ṭhin a ni, tiin thawnthu an nei a ni awm e.

Chuvang chuan, mi an thih veleh hian thihna luipui him taka a dai kai theih nân, lawnglêng chuan man tur pawisa a ken tur, langsar takin a chaldârah tak an bel ta ṭhin niin an sawi! (Khang hun lâia tangkaraw dik tak chêng khat chu a hlu hlein a rinawm).

A enga pawh chu lo ni sela, kan pi leh pute pawhina an tih ngai pawh ni hlei lo mitthi chala pawisa thir dah hi Mizo kristiante tân chuan tih ve chi niin a lang lo. Kristianna nen sawi zawmna tur a awm si lo. Pawisa thir (coin) hian thil rimchhia paih theihna a nei pawh a ni bawk si lo.

Mitthi rim chhiat kan hlau a nih chuan doctor leh nurse-te râwn mai ila, dam­dawi lam awm lohna hmun a nih leh val upate râwn ila, an nin a ngaihna an hria ang. Hawh u, kan hmangaih kal ta te chaldârah kher kher hi chuan tangka (coin) i bel tawh lul suh ang u.

- Vanlalngaia, Ramhlun North