2023 MLA Inthlan

Kan ti nek neka MLA inthlan kum a nih hmaa fur hnu­hnung ber kan lo thleng leh dâwn hnai ta reng mai. MNF Sorkar hi an vàn a duai a, kum hnih zen zawn an duh anga hnathawk thei lovin hripui dovin hun an hmang liam ta.

A lehlam zawng taka kan thlir chuan he hun harsa takah hian MNF Sorkar theihna sawr chhuah­na remchang leh an chakzia show na a lo ni tho mai a, kum khat ṭha bâk sorkar na hun tun term ah chuan an nei ta lo.

Kan ngaihven tlan tur chu BJP hian kum 2023 ah sorkar siamna hmanrua nih an tum dâwn tih hi a ni. Hei hi thil thleng thei a ni tlat a ni tih chu kum 2019 Lok Sabha inthlan vote trend aṭang khan kan la chhinchhiah thei ang.

Tuichawng bialah hian NDA (BJP or MNF) tán lo chuan vote hmuh theih a ni lova, BJP leh MNF hi an thawh dun bawk si loh chuan Dr BD Chakma hi MLA chiang sâ niin BJP hian MLA pakhat an nei leh dâwn tihna a ni.

Kum 2023 ah hian tling chiang tur sawi dâwn ta ila Dr BD Chakma bakah hian Serchhip bialah Pu Lalduhawma chiah hi sawi ngam an awm niin tun dinhmunah chuan a lang.

Congress biak him Tlabung leh Thorang te hi 2019 Lok Sabha inthlan aṭanga en chuan a hma lawka MLA an tlinnaah khan MNF candidate-in vote a hmù säng zawk a ni. Chutih lai chuan MNF tana bial him (100% chiang) kan tih tur hi sawi a harsa a, bial 20 vêl chu la thei an la ni tho mai.

ZPM pawh an MLA neih sâ hi an la tling leh zo hlawm dâwn em ni? Bial lak thara mual mual chu an nei dawn a, an bial an hum thei dâwn em? tih hi zawhna chhan harsa tak a lo ni leh ta chiah mai.

Tunah hian a Congress, a MNF, a ZPM, a BJP ang pawhin tumah an ṭawng huai ngam bik miah lo. BJP chance chu Lawngtlai District leh Lunglei District bial ṭhenkhat bâk leh Siaha leh Mamit District-ah sum leh NDA power nen an beih chuan MLA 5 nei thei ta se. Manipur-ah te Goa lamah hmana kan hmuh ang khan MLA nei tam ber ni si lo, sorkarna chang thei si an ni ve leh thei tho a ni.

Politics-ah thil thleng thei lo a awm lo, BJP hi tih mai mai chi an ni ta lo Mizo­ramah pawh hian.

- Lalthanmawia