Hnamdang dawrkai

Mizoram humhalh nan ṭan kan la hle a, hnamdang dawrkai pawh an tam lo hle.

Nagaland-a khaw-pui lian ber Dimapur-te khu hnamdang khawpui emaw tih tur khawpin dawrkai lian deuh chin khu chu hnamdang an ni deuh zel. Mizo­ramah erawh chuan hnamdang dawrkai hmuh tur an tam lo a, ka thlen ve chinah chuan Saiha leh Lawngtlaiah hnamdang dawrkai an tam ber.

Tunhnai deuh khan khaw ṭhenkhat chuan an khuaa hnam­dang dawrkai awm an phal loh thu an sawi.

Dan dik loa dawr an kai ve ringawt hi a huatthlala hle a, anmahni lo pui a, an hming lo hawhtirtu Mizote ngei pawh hi an ngeiawm hlein ka hria. Hnamdang dan loa dawrkaite hi an ngeiawm a, an chungah action kan la a nih pawhin Mizo, mahni hlawkna ûma hnamdangte hnena hming hawhtirtute pawh hrem dan emaw awm thei se a ṭha ngawt ang.

Chutihrual chuan hnamdang dawrkaite hi man tlâwm zawka mipuiten thil kan lei theihna a ni deuh zawk zel a, chuvang chuan mi rethei leh mipui tam ber hmakhua kan ngai a nih chuan hnamdang dawrkai hi lo ngei ngawt theih niin ka hre lo.

Dan dik tak leh dan dik lo chu enga­pawh ni ta se, hnam­dang dawrkai hian Mizo sumdawng tam tak ang lo rilru an pu a. Anni chuan ṭum khata hlêp ṭeuh nghal emaw lam kha an ngaihtuah lo a, hlêp tlêm te te neiin, inkhawl reuh reuhin an khawsa a, vawilehkhata hlawh­tlin thut an tum ngai lem lo. Hei vang hian tlêm deuh pawh lo hlep se an pawi ti lem lo a, an teirei peih a ni.

Mizote erawh chuan ṭum khata hau­sak nghal a nih loh pawhin hausak thuai kan duh avangin hlêp hnem kan tum ṭhin. Chuvang tak chuan a nia, hnamdang sumdawng pawh hi kei chuan ka welcome viau. Man tlawm zawka kan lei theihna tur a nih chuan hnamdang sumdawng hi awm nual se a ṭha ang. Mizo dawrkaite nen chuan dawr an innawm hleih si a, biak an innawm hleih si.

Economy lama market competition tih ang hi keini ramah hi chuan a awm lo. Eng pawl pawl emaw an din a, chung mite chuan thil man an bithliah a, man tlawm zawka thil ṭha zawk lei tih lam hi chu kan la hlat hle.

Rise cooker mai mai pawh, Shillong-a Rs. 1500 man vel kha Aizawlah chuan Rs. 4000 te a ni mai ṭhin a. Chuvang chuan kei chuan hnamdang sumdawng an awm hi pawi ka ti lo khawp mai.

- Lalhlimawmi Ngente