Kum tling lo

Keini dan leh hrai che ve vak lo hi chuan eng chin hi nge kum tling a, eng chin hi nge tling lo tih hi kan hre hrang ve mang lova, Pu KL Liana’n pawngsual chungchang a sawifiahna thu erawh awm hmunah kan lo nuihpui kur kur ṭhin a ni.

Tun hnaiah keia ngaiha kum tling lo pahnih, leiminin a chhungte a laksak tak mipa naupang leh pa eisual avanga a chhungte chân ta hmeichhe naupang pakhat chanchin hi tawi te ka han ziak ve duh a, dan hre mite cho chhuahna lam, mi sawisel tumna lam a ni lo vang.

Khatia mipa naupang vanduai, a chhungte leimin avanga an boral tak vek avang khan rimawi lam pawl pakhat, mite tana ṭanpuina pe ṭhin chuan boruak lian tham takin ṭanpuina sum an khawn a, an tiṭha takzet a ni. Keia lo ngaimawh ve chu a mipa naupang hming, an khua leh a thlalak thlenga hmuh tur a awm kha am ni a, khatia ti lo khan ṭanpui dan an thiam awm tho si a, kha naupang kha a ṭhan len thlengin ‘fahrah khawngaihthlak’ tia hriat reng a nih tawh dawn avangin ram pum huapa tlang than tir loh dan ngaihtuah thiam se ka duh khawp mai.

Pa ei sual avanga a chhungte zawng zawngin an thihsan hmeichhe naupang khawngaihthlak danglam bik pawh kha inkhel ennaah an han pawm chhuak a, a thla an han la chuai chuai a, a zialo khawp mai. Kha naupang khawngaihthlak dinhmun kha ram pumin kan hria a, hmeichhia leh patling meuh pawh vel ṭaptu a nih kha maw. Pawisa an pe duh a nih pawhin vantlang hriata pe hluai lo khan, an inah va kal chilhin va pe ta mai se, hmeichhe naupang thlalak zawng zawng nena kan han hre thar leh kha chu a ṭhan len hunah pawh ‘chhinchhiah’ a ni tawh dawn.

Kum tling lo hi chu vantlang hmaah hian pholang hmanhmawh lo ila a ṭhain ka hria a, dan hre mite kha eng nge in ngaihdan le?

- Lalremruata (Marema)