Kawngpui tlo tura enkawl dan tur rawtna

Ni tin, zan tina mipuiin kan hman ṭangkai leh thil pawimawh ber zinga mi chu kawngpui hi a ni. Kan mamawh em avangin sorkar leh company ten uluk leh ṭha takin han siam ṭhin mah se chhun zan zawma lirthei leh mihringin kal nan, dim miah lova kan rah nitin avangin a rim em em a, a tlo rei lo fo pawh hi kan hman rim dan han thlir chuan a awm ve viau zel.

Tun thla chhung hian kawngpui siam ṭhatu leh enkawl­tu, sorkar chuan Department hnathawkte hmangin a siam ṭha tan leh mek a, a lawmawm hle. An siamṭhat zawh rual ruala a hmang ṭangkai bertu mipuiten neitu rilru pua kan enkawl dan tura ṭha ka tih ka han tarlang a, thuneitu leh mawhphurtuten lo bawhzui ula ava lawmawm dawn em!

Kawngpui (alka­tara) tichhetu ber chu tuitling a ni a, a bik takin kawng siamtuten tuitling lo turin siam se. Kawngpui kama dawr leh in neitute hian a bik takin kawng thlanga awmten, an ramri-ah tui luanna an siam ngei ngei tur a ni. Hei hi Local Council hotu leh PWD hotuten mawhphurin vil se.

Kawngpui venghim tura mawhphur tur: Kawngpui hi mipui zawng zawng tana siam a ni a, a duh apiang kal nan leh hman ṭangkai vek theih a ni, mah se kawngpui kama in leh dawr neitute hian mawh an phur lian ber tur a ni. Eng vangin maw? Kawngpuia ana in an neih avangin kawngpui zar zovin an in a hlu bik a, a kawmthlanga chengte aiin an ram man pawh a let tam takin a sang bik a ni. Sumdawn nan a remchang bik a, office-ah leh thil engkim atan a hlu bik.

Heti taka kawngpui zara ram leh in a hlut bik em em avang hian an ram zawn kawng­puia tui tling leh khuar, tichhe thei chu an ven theih tura mawhphurhna pek vek tur an ni. Sorkar sum hmang kher lovin an tual zawn venhim leh siam ṭhat chu AMC leh PWD ten kawng kama in neitute mawhphurhah dah se. A lo chhiat palhah an mawhphurhna a nih thu leh sorkar pawh hrilh bengvar tura an duty a nih thu hrilh vek se, a enkawl fai thuah pawh mawhphurhna pe vek se, a ṭhat hle a rinawm.

Supervisor: AMC aṭangin emaw PWD aṭangin emaw kawng­pui venghimtu (duty) Supervisor neih ngei ngei ni se. Hei hian tui tling leh kawng khuar a awm em, thing leh thir dah hnawk leh kawng tichhe thei leh tibawlhhlawh thei thil a awm leh awm loh kar tin fang ziah se. Kawngpui kama in neitu mawhphurtute pawh ko khawmin an mawhphurhna hrilh thar zel se, hetianga kan tih chuan kan kawngpui hi a tlo tawh dawn a ni.

Doctor hovin tih­dam aiin inven a ṭha an tih thufing hi hmangin a siam thar tirh aṭangin venghimtu ni turin mitinten kan ram i siam ang u.

- R. Vanlalzauva