SEDP hi dawng lo ngam awm se aw!

Tin, State puitling kan nih achin retheite retheih­­na denchhen rana politik kheltu, pachhiate pachhiatna hmanga rorêltu nih khel kumkhua tawhtu Party chuan a ze ngai bawk chhuah lehin, inthlan hma kum khat la awmah a Flagship Programme ropui tak chu a taka kalpui tumin, vawiin khân ṭhukhawm a huaihawt ta a nih hi. Ngaih­tuah chian poh leh thin a rim a, ngaihtuah ngun poh leh lûngchhiat a zual!

Mi ram leh State danga ram rorêltute chuan, sawr­karna an chan phat aṭangin mipui hnena an inzawrh­na tihhlawhtlin tumin theihtawp an chhuah nghal mawlh mawlh ṭhin a. Ram ropui USA-ah phei chuan President-in a dinhmun a luah aṭanga ni 100 chhûng ngeiin hmasawnna hna a thawk ṭhin a nih hi.

Keini ramah ve thung chuan, inthlan leh thlir ranin sawrkarna an chelh aṭanga kum 3 a liam hma loh, nakum maia inthlan a hun tak avang chauhin a kum 4-naah sawrkar a che chhuak ta hram a!

NLUP hnuaiah pawh hei bawk hi kalphung ropui kan hmuh ṭhin a lo ni tawh a nih kha! He kalphung nghet bur mai awmzia ber chu, Sawrkar/ Party hian pawisa hmanga inlei tlin tum chung zelin, a prawkrem-te a kalpui ṭhin tihna a ni. Chu mi awmze dang leh chu, Zoram mipui tam zawkte hi sum themlem tak hmanga lei theih nia ngaihna lian êm êm, Politician-te leh Party-te hian an nei tihna a ni bawk. Zahthlâk heih heih tak a ni!

Zoram mipuite pawh a hminga Kristian êm êm ni si hian, sawrkar khaka a kalphung thlâk danglamtir tum ai chuan, therhlo hmanga Lal Isua phat mai hi kan awlsam êm êm a nih hi. Kum 5 chhûng sawrkar tur hian, kum 4-na laihawl vel aṭang chauh zelin mipui tân ke a pen ṭhin a. Chu chu haw ngam emaw dodal ngam emaw kan awm hlawl lo hi, a manganthlâk teh zawng a nih hi! Kum 1-na aṭanga kum 4-na bul thlengin anmahni an inchhek­arbawm hmasa tê tê a.

An inla lianin duhtâwk (sumin daih hek lo, an duhtâwk mai loh nákah) an ngah ta maw tihah, nakuma inthlan thlir ran chungin an prawkrem ropui chu a takin kalpui an han tum ta a. Chutah pawh lûngchhiat ti zual tur tingin, atira cheng nuai 3 sem tih lam reng reng a lang pha lo. Installment-in pawisa leh thil dang an han sem leh ta zel a. Chuti chung chuan, Fakselna leh Vantlâng Puipunna hmuna kan titi aṭangtea han inbih chian hian, Zoram mipuite hian harh chhuah kan hlau hluah hluah ni berin a lang tak deuh deuh a nih hi!

Chu mai a ni lo, Party pahnih kalphung chu hei zawng hi a ni a. Engtikah mah inthlâk danglam tumna tak tak an nei lo tih, kan hming kan hre chiang tluk zetin kan chiang vek a. Chu kalphung thlâkna tur kawng dang siala a han awm dâwn meuh chuan, Zoram mipui tam zawk chuan kan duh leh bur lo! Mak tak kan ni, mak tak!

Kum 30 chuang kalphung nghet bura Party pahnihin an lo neih, sum hmanga inlei tlin tumna hnuaia hlawhtlin ngaihna reng reng awm lova hmalakna chu a takin kan thinhrik ngam tak tak lo!

Kawng thar siala lo awm tur zawka helh êm êm, theihtawp chhuaha lo sawisel nghal char char duh Kristian Taliban tamna he Zoramah hian, kum 30 chuang kan enchhin hnu pawha beiseina a zung nen lam lei thuahriat hnuaia phumbo duhtute la enchhin tluan zel zawka chu, kan duhthlanna ber niin a la lang ta fo a nih hi! Ngaihtuahna fim kal tlanga han chhut pawh hian, Zoramah hian mi â leh fing lo rual an lêng suau suau a nih ber hi tih loh rual a ni lo!

Delhi chuan danglam a duh a, huai takin kalphung hlui a mausam mai. Bihar chuan sawi chhiata awm reng chu duh tawh lovin, a kalphung a thlâk danglam ngam mai. Keini, Dikna leh Felna Pathian betute erawh chuan, Setana leh a hmanruate chu duh taka ṭanglaia pawm hle hle kan la duh ta zel thung a nih hi. ‘Democracy chu mi mawl pathumin mi fing, a ngaihna hria mi pakhat an salbehna’ tih thu fing tawi hi, he Kristian ramah hian a la dik tluang ta zel zawng a nih hi!

- Lalremliana Pachuau