MIN HRILH THEI EM?

1. Hmangaih loh thut dan tur che min hrilh thei em?

2. I wall leh last seen check loa awm dan min hrilh thei em?

3. Nang lo biak leh hram hram ṭhin loh dan tur min hrilh thei em?

Hmangaih tawh loh dan che min hrilh loin i kal thut a, i ngaihnep hlawh khawpin ka hmangaih phah ta che a ni.

Khi thu khi tunlai ṭhalai tam takte’n kan rilru a ni tiraw? Kan sawi chhuak lo a, kan sawi chhuak thiam lo a, mahse a rukin kan tuar ni tiraw? A chhanna kan nghak a, kan beisei a, kan zawng a ni. Ni e, tun hma angin lehkha kan inthawn tawh lo a, inbiak theih loh bur hi chu kan nei tawh lo a ni tiraw - internet signal a

ṭhat phawt chuan. WhatsApp leh Messenger kan hmang a, kan thlalak thar ber ber te, kan ‘DP’ leh ‘Pro-Pic’ te chu mit khap kar lekah kan inthawn tawnin kan hmu zung zung tawh a, ṭawngkaa kan sawi ngam loh thu thlum tak takte chu kan mut hmun aṭangin awm dun lo mah ila kan inhrilh a. Kan kur a, kan hlim a, kan tlaivar ti tih hial ṭhin a nih hi tiraw?

Thil thui tak la ngaihtuah thiam lo leh ngaihtuah thiam fu tawhte pawh kan tlukna bul ber chu hmangaihna thumal vang hian a ni tlat. Tleirawl lungmawl tak leh rilru thianghlim tak kan ni a, kan duhte lakah ui chin leh thup chin nei loin kan lo khawsa a, chu chuan kan inkar a chhiatin nghawng ṭha lo tak lo neiin kan rilru a hahin kan nun a buai a, intihhlum hial kan duh ṭhin a ni tiraw - kan intihhlum phah hial reng bawk a!

Nun pangngai taka bul ṭan leh tum mahila kan sulhnu an lo ‘screen shot’ leh ‘photo’ te chuan min umzuiin min vau zui a. Kan thawpik a, kan bing a, kan inchhir ṭhin. An tan kan inpek zawhna thuk ber thil te khan kan mualpho berna tur thil a lo keng tel tih kan hriat meuh chuan tih theih kan nei tawh lo; kan ṭap a, kan hlau a, kan khur a. Kohhran belin Lal Isua nen nun bul ṭan ṭhat leh tum mahila Setana chuan kan inbox hlui te, kan photo hlui te hmangin min lo vau in min lo bei a. Lal Isua ngaihdam tlak tawh loh nun bawlhhlawh neiah min puh a, kan ṭha hlei thei tawh lo a, kan thla a muang thei tak tak lo a, kan mualphona vawrtawp lo lang chhuak thut thei chuan kan bulah lo lan tumin min lo vau ve reng bawk si. Heng zawng zawng bul tumtu chu ‘hmangaihna’ tih thumal kan nunpui vang hi a ni tiraw?

Awmmawh vang leh sihhnip vang ngawr ngawr chuan heng WhatsApp leh Messenger a kan sulhnu te hian min tibuai lo - kan duhna leh kan hmangaihna lungmawl tak vang zawk khan a ni kan buai ṭhin. Zan khat thilthu maiah mihrang niin kan inkar a lo chhia a, kan sulhnu leh thlalak te chu a lo chhe ve mai lo a, kan mangang a, an last seen leh wall te kan check a, kan hlimpui em em ṭhin chu kan rilru tinatu, kan mittui titlatu an lo ni ta. Kan hrilhhaiin kan hrethiam lo a, ko mahila a sawt tawh lo fo ṭhin. Chung zawng zawng tihdamna leh chhana chu min hrilh thei em - tiin mi dang hi zawt mahila kan damna kim chhanna min pe thei an awm lo. Thil pakhat chiah chhanna dik a awm - Lal Isua neih hi.

Kan inngaihzawn bulṭanna aṭangin Lal Isua hi a laiah dah char char ila, kan mualphona tur leh kan inchhir vawng vawngna tur thil hian hmun a chang thei lo - kan WhatsApp leh Messenger a kan sulhnuah leh a takah pawh. Mualpho kan hlauh vanga nau kan tih tlak te, kan thlalak leh kan inbox vanga min tihmualpho an tumna te pumpelhna tur leh thleng lo tur chuan Lal Isua nen bul kan ṭan a ngai a ni.

Kan thianghlimna (virginity) hlu tak kan hloh lohna tur chuan Lal Isua nen ngaihzawng kan neih a ngai. Kan hloh tawh hnuah chuan kan inchhirzia chu a hre chiang bertu leh a tuar bertu kan nih kha. Lal Isua neih tuma bul kan ṭan ṭhatna kawngah a tel loa kan nun lo hman tawh sulhnu khan min umzui a, kan inpe pumhlum thei lo fo ṭhin a ni kha. A chang phei chuan kan beidawngin sual law law te kan thlang a, beidawn tak tak hnu phei chuan mahni nunna lak phah an awm fo bawk a ni. A pawi vawng vawng!

Tuna i hun tawn mek hi ka hre lo a, eng dinhmunah pawh lo ding la Lal Isua nen bul ṭan chawt mai rawh. Setana chuan i ṭawngkam bawlhhlawh ber ber leh i thlalak zahpuiawm tak takte chu lo ‘screen shot’ mahse hmangaihtu Lal Isua chuan a ‘clear’ vek tawh a. I ngaihdam dilna thu te, i inchhirna thu te leh i sualna zawng zawng nena i panna thu leh nun zawk kha a save-in a ‘screen shot’ tawh zawk a ni tih hre reng la, ringhlel loin pan ang che.

I rilru hahna thuk ber te, i mualpho mai theihna te leh i nun zawng zawng chhiat vek theihna kha i rin ber te bulah i sawi chhuak ngam lo a, i nun a vaw chauin i thlarau nun pawh a nghawng ngei ang. Chung zawng zawng chu Setana leh Lal Isua hian an hre vek a, sual law law, thi hmak tura duhtu che Setana nge i pan ang hmangaihna nena ngaidamtu che Lal Isua? Chung zawng zawng lo nih tirtu che Setana chuan thlemin mahni inthiamlohna neih tir tlat che mahse hnawlin Lal Isua chu thlang tlat la, i mualpho a nih pawhin khawvel leh Lal Isua hian a tawpah chuan an ngaidam ang che.

Hmabak tam tak ila nei a, nangmah anga harsatna tawk mi tam tak chhanchhuak a, Lal Isua nei tura fuiha zirtirtu ni turin Lal Isuan ‘model’ atan a duh che. Setana’n i nun tichhiain a ‘model’ ah lo hmang tawh che mahse, Lal Isua hmangaihna chuan a ngaidam che a, a ta ni tur leh nangmah anga harsatna tawk mekte chhanchhuak turin i kut leh ke, i sulhnu leh nun hlui te chu a duh a ni tih hriain hma lam lo pan ang che.

Lal Isua’n a hmangaih che.

- Rinfela Zadeng