Mizo pa hausa

Hman deuhah chuan Pu Pachhunga a hausa ber an ti. Pu Hauva pawh a hausa an ti. Pu J Lianchungnunga (JL), Mana & Sons, Buangthanga, R Lalawia etc hi an hausa an ti ṭhin. An hausak chhan hriat vek a ni. An sum thawh chhuah dan hriat a ni. Khawtlang leh kohhran pawhin an hausak chhoh dan an hria a, an rilru leh thinlung takin an pawmpui.

Tunlai hian Mizo pa hausa ber inzawt ta ila, kan ngaihdan a inang lo. Tu hi nge hausa kan hre lo. Tu hi nge, “In rin aiin bank-ah sum a dah hnem” an tih pawh kan hre tawh lo. Hausa ang taka lang chhuak zingah pawh hian, an sum hmuhna hi kan hre lo.

Sum ngah ber ang maia donation, sponsorship leh thilpek hrang hrang uar deuh Mizo pa hausa lara lar tharte hi, tuna an sum hmuhna ni lo hman ni deuha an sum hmuhna kha kan hre lo. Hausak thut theih dan chu lottery man leh thil dik lo tih hi a ni deuh mai. Lottery an man kan hriat loh, hausa ta thutte hi kan rilru chuan a ngaisang lo.

Hausa thar thut reng reng hi an inthup thiam lo. Thil thar an neihte hi an tlangaupui nasa ṭhin. Mi neih ang tho an neih te hi an au pui vak vak ṭhin. Miin an lei zawh ve tho thil an neihin an thup thiam lova, miin an hmu lovang tih an hlau a, tih lar hi an chak ut ut ṭhin. A chhan chu tun hmain an hausa ngai lova, an han hausa ta a, puanzar an chak.

Hausa ṭhang chu an ngawi hle hle. Hausak dan kan hriatpuite hi chu an uikawm emaw tih tur hian an ngawi thei. A hunah chuan pawisa hi an thehchhuak leh mai. Pu Bualhranga (Lianchhunga Bookstall) in Durtlang Hospital lama cheng nuai tam tak a pekte kha ngaihtuah ula, nuai hnih khat tlangau pui chiam ṭhinte tan chuan a zahthlak zawk. Hetiang mi hausa ṭhang, an hausak dan belhchian dawl hi chu kan ngaisang. Tun hnaia ‘mihausa’ (hausak hmel) hi chu kan ngaisang tak tak lo.

Hausa hian hausak hmel anga lan an duh ngai mang lo. Hausa thar thutte hi chu an insum zo lo. Hausa thar hi chuan hausa anga lar an chak. Tunah chuan eng eng emaw tiin an hausak chhan niawm kan hmuhte hi, hetiang dinhmun thleng tur hian hman ni deuh khan lottery an man kan hre lova, rangkachak khur an neih pawh kan hre lo. An lo hausa ta a, mipui zinga ṭhenkhat chuan an lo ngaisang. Mi pangngai chuan an ngaisang lo. Mi pangngai nuih an tiza. A bikin mi hausate nuih an tiza zual.

Mizo pa hausa ber hi ka hre lo. Hausak hmel nazawng aia hausa hi an tam ka ring. Hausak dan chhui chian dawl, hausa thar thut ni lote hian Mizo pa hausa anga lan an duh lo. Hman deuha kan hriat loh, tuna hausa tate hian hausak hmel anga lan an chak. Mi pangngai thil chhut thiam chuan kan ngaisang miah lo.

- C Lalchhandama