Aw, ramri buaipui a hun chiah

November 17, 2020 Vanglaini chanchinbu kha kan chhiar chuan, "Ramri buaipui a hun chiah em?" tiin Editorial-ah zawhna a rawn zawt a. Ka chhanna chu, "Aw, ramri buaipui a hun chiah," tih hi a ni e.

Tuna kan dinhmun chu ngaiawh aia chhe hret a ni a, a hmaa kan dinhmun kha kan phak dawn lo niin a lang. A chhan chu Assam lamin thiam takin central force an ko lut a, chu mite chu kan ramri buainaah an awm chat chat a. Tunah zet chuan BSF leh SSB te thuhnuaiah kan ramri a awm tawh a, ramri hi kan zauh thei tawh dawn lo. 

Mizoram sorkar Cabinet meeting khan ramri buaina awm hma daih tawh khan Bengal Eastern Frontier Regulations (BEFR) 1875 (Inner Line Forest Reserve) hi Mizoram ramriah an pawm thu an rel ve ringawt a. An ramri pawmah chuan Mizoram Police an dah ngam lo mai ni lovin Lailapur a buaina siamtu Raju-a an tih pawh an zuk man ngam lo a ni. Raju-a te khua Lailapur hi Inner Line Forest Reserve 1875-ah chuan Mizoram chhung vek a ni si a. 

Mizoram chhungah Inner Line Forest Reserve 1875 hi kan pawm tak tak a nih si chuan, eng vangin nge Lailapur field chhakah kan IR Sipaite kha an tawp ngawt, kan ram nia Mizoram sorkar Cabinet meeting-in a pawm Inner Line Forest Reserve 1875 tawpna ramri Dholai bulah va duty ang hmiang. Tumahin Dholai bula kan ramri sawi hi neih tumna tak tak nei ngam lovin Raju awmna chhakah Vairengte daiah IR kan daha kan inti thei em em a. Kan MLA leh Minister ten an zuk tlawh a, lukhum parh nen thla an lak pui a, kan IR te silai ṭha nen an duty a, chu tih chhung zawng chuan Lailapur vai sumdawng Raju hovin kan kawngpui an lo dang char char a, an zuk hawng ngam chuang lo. 

Lailapur hi kan ram chhung a ni chiang a, kan state hruaitu rual ṭhukhawm Cabinet meeting chuan BEFR hi a pawm tawh a, kan hotuten an pawm chu kan ram a ni tawh mai. 

Kan ram chhung ngei Lailapur-ah Mizoram hmun danga lut tur lirthei an dang bet vek a, petrol leh diesel pawh nei mang lovin kan buai a, mahse kan silai ṭha tak takte chu kan ram chhungah chiah kan tin a, tumahin ramri chu kan zau bawk si lo. Tunah chuan kan ramri hi Central Force venna hnuaiah a awm ta daih a, kan zauh thei tawh si lo. 

Tunah hian kawngpui a tlang tak avang leh Assam-in min beih chhunzawm loh avangin ramri hi a fel a ni lo; a la buai hle reng a ni. Kawngpui a tlang ta chiah bawka ramri buaipui tak tak hun a ni. BEFR hi kan pawm chuan bawhzui rawh se kan Council of Minister hian, duh duh chin kawh ve ringawt hi ramri zauhna a ni si lova.