KAN ZA-A MAWH

Thil dik lo do turin huaisenna kan tlachham, midang ngaihdan kan ngaihchan chhungin kan ram hi awmna tlak lohah kan siam mek. Kan lui dungah tui a kang chat mek a, thing pakhat lek hlutzia hre phak lo khawtlang leh ram hruaitu kan ngah. A hun taka ruahtui dawng turin kan sik leh sa-in a zir tawh lo. Harh a hun tak zet e.

Hmun awl awm apianga In sak khah duh zel mai hruaitute hi inngaih­tuah chiang se la. Park nuam tak, hawi khaw thawnna tur siam duhna rilrupu leh hmun remchang apianga thing phun a ṭulzia leh, a awmsa pakhat lek pawh humhalh a ṭulzia hretu hruaitu mamawhna a sâng ta hle mai.

Aizawl khawpui angte hi chhiat rupna lo thleng thei, a bikin lirnghing laka kan him theihna tura tlan khawmna tur hmun awl nei mang reng reng lo khawpuia kan han siamte hi zah nachang hriat a hun. Concrete jungle karah hian a tlak tlak vanduai ti niawm fahrana kan han khawsa nulh nulh mai hi chu kan khawngaihthlak lua deuh e.

Tun dinhmunah chuan Assam Rifles chhuah hlan hi ka nghakhlel lem lo, 2019 Chapchar kut-ah khan pu berin, "AR chhuah hunah mi sing leng 'In' kan sa ang" a tih kha, a ngaithlatu zingah ka tupa nen kan telve, mipuiin kut an beng, kei erawh ka rilru a hnual rawih. A chhan chu insak nan ka phal mawlh lo. Tun hnaiah Dy Chief Minister-in auditorium sakna turin sum an neih tawh thu a sawi leh bawk, a ngaihnawm hlawl lo, mipuiin dodal thei ila, ka duh ngawt mai.

AR chhuah huna ka lo dream ve chu, Aizawl mipui thawk lak nan Park nuam tak siam a, thing leh pangpar mawi tak tak awm nan ka awt ngawih ngawih a, tu leh fate nen chhungkuaa han len khawthawn nan te, nula leh tlangval thla muang taka an thut khawmuan nan te, ka awt a ni. New York-a Central park te khu tluk mah suh se, khutiang ang khu neih ve ka châk a ni. Mahse, chutihrual chuan In lianpui pui ngaihsanna leh hmun awl deka sak khah chak tlatna rilru hi kan neih chu a la nimiau mai si a, a la hahthlak rih ngawt mai.

In lianpui pui sak chakna rilru hi a sâng lua lo va, kan naupanlaia vai ram khawpui in ropui tak tak ding khep khup ka awhna rilru ang vel kha niin ka hria. Vairamte angin kan hmun leh hma te chuan daih ve chu nise thuhran a ni. Milennium Centre shopping mall an sak dawn khan keima phak tawk tawkah sa lo turin ka lo sawi ve nasa a, a sawt hlei lo.

Ka duh loh chhan hrang hrang zingah, sawti khawpa Dawrpui tawt tawhah dawr zahnih aia tam awm belh a, a dawrtu tur a za tel hnuk lut belh tur chuan, kan hmun hmain a zo tawh lo va, traffic jam a nasat belh dan tur leh mipui kan tawt phah zual turzia ka ngaihtuahin a rem ka tithei lo, kan duh a nih chuan hmun hla zawkah mipui pawh darh nan sak ni zawk se, tih leh Aizawl khawpuiin public park pakhat mah kan nei lo, kan neih chhuna kan ngaih kan naupanlaia 'children park' kan tih ṭhin city park kan tihtak lah mi naran luh phal a ni bawk si lo, tunah sawn luh man chawi chuan a luh theih a, phul leh pangpar vel nena mawi taka chei kha a ni tawh lo.

Tuna MC dinnaah sawn park nuam deuh siam nan ka lo it ṭhin, chhiat rupna lo thleng thei laka mipui tam tak himna tura tlan khawm nan a rem ang a, chu bakah veng hla tak tak aṭanga office dawra lo kalten an dawr turte an hmuh remchan mai theih loh pawha nghah nan leh hahchawlh nana an lo hman kha, a hlu em em dawn a, tun dinhmunah hian taksa chak loh leh kawngkal hahchawlh mamawh tan kan hmun lai li-ah hian han hahchawlhna mai tur kan nei mang reng reng lo, chutiang siamna tura hmun remchang kan neih awm chhun chu a hunlai khan MC dinna saw a ni. Mahse, in ropui tak sak nan kan it tlat si, kan la chhuang viau lehnghal a ni awm e. Khua leh tui ngaihsak lo sorkar hrawn reng hi mipui hian kan ba lo asin. Chuvangin, hotute leh mipui i harh teh ang u.

Central sorkar aṭanga sum hnik chhuahna hmanruaah hi chuan khawi hmun pawh ni se, kan hmun awl leh ṭha, thing leh mau chin theihna tur leh awm tawh sana hi chu i awt lul tawh lo teh ang u. Keimahni ngei hian he ram hi awmna tlak mang loh, hmun hrehawm zetah kan chhuah mek tih hi hria ila, i harh ang u.

Tunlai khawvela thiltih hman­hmawhthlak ber chu 'thing phun' a ni. Chutiang a nih laia a chereu zawnga hmalatu nih chu thil zahthlak tawp, 'tunlai khawvel hmelma' nihna a ni. A awmsa kit chereu zawnga khawsak hi a ṭul tawpah lo chuan ti miah lo ila, tin, thing phun theihna lai apiangah phun tum bawk ila, a phuntu-ah kan ṭang thei lo a nih pawhin a humhalhtu nih tum tlat ila. Keimahni tan mai pawh ni loin ṭhangthar lo la awm zel tur tan ram nuam kan siam dawn a lo a ni. Chuti'ng ram nuam siam tur chuan kan zaa mawh a ni e.

- Rosanga Skpk