Khel zui hlawh inkhawmpui speaker

Kumina KṬP General Conference zet chu, palai an kal tam ber ṭum ni lo mahse huhâng a nei lian hle mai a, sawi zui a hlawh hle mai. A chhan ber chu speaker Rev. Chuauṭhuama thu sawi vang a ni.

Kum 2001-a Cham­phaia KṬP Gene­ral Confe­rence-a thusawite khan sawi zui a hlawh hle bawk a. Pu Vanneihtluanga'n, 'Ṭhalaite leh tunlai khawvel' tih a sawi khan sawi zui a hlawh hle a, ṭha ti em emtu mi tam tak an awm a, chutih rualin, lo helh deuhte pawh eng emaw zat chu an awm bawk àwm e.

Champhai 2001-ah khan speaker Rev. Vanlalbela thusawite kha miin an ei hle mai a, KṬP inkhawmpui liana Speaker thusawi sawi zui hlawh ber pawl tak leh miin an hriat rengte zinga mi a ni a, Rev. Vanlalbela lar chhuah tak tak ṭanna niin a lang bawk.

Kha mi hnua KṬP inkhawmpui lian speaker thawm nei lian leh ber chu kumina speaker Rev. Chuauṭhuama hi a nih a rinawm.

Tun ṭum KTP General Conference thupui chu 'Tunlai thil awmzia' tih a ni a, Bible-a a innghahna chu Rom 13:11 a ni. Speaker hian Inrinni zanah thu a sawi ṭan a, zu lam a sawi tel avangin Mizorama rorel lai MNF party lam chuan an lawm hle mai a, an worker-te'n social media lamah an thehdarh nasa niin a lang a. Chutih laiin, mi ṭhenkhat erawh chuan thu­pui leh thupui in­nghahna Bible cháng ngaihtuah lem loin an sawisel nasa mai thung - Thawm a nei nghal hak.

Pathianni chaw­hma inkhawm­ah Speaker chuan thu an sawi leh a, a hma zan lawka a thu sawi ai mahin thawm a nei lian ta a, Mizoram pumah an/ kan sawi zui ta luih luih mai a. Mi tam takin ṭha an tih laiin, lo nat ngawih ngawih phah pawh mi tam tak an awm niin a lang.

Thusawi eng eng emawah hian inngaihbel tawk hi an awm ve châwk a. Rev. Chuauṭhuama thusawiah pawh khan, mipuiin ram rorelna ṭha an duhzia leh rorelna ṭha lo nghawng a natziate a sawi lan rualin, political party mal hming a sawi miah lo a. Chuti chung chuan, lo inngaihbel bik party an awm emaw ni teh chék, lo la na bik riau an awm niin a lang a; social media-ah an khel ta luai luai mai a nih hi.

Rev. Chuauṭhuama thusawiah khan tute emaw tan lo inngaih­bel theih leh lawm lohna tur a awm a nih pawhin, thu dik lo sawi a ni bik si lo a; huaa amah beih let chiam aiin, insiamṭhatna tur a awm a ni tih hria a, inhmuhchhuah nan leh insiamṭhat nan hmang thei hlawm ila, a va ṭha dawn em!

- KT Zoramchhana