Dawr hi hawntir vek a ṭha zawk ang

Mizoram sorkar chuan Covid-19 hri darh zel tur venna atan Aizawl khawpuiah dawr inhawn chhawk turin a rel a. Task Force ṭhenkhat chuan ṭha takin an kalpui a, veng ṭhenkhat chuan hei hi an zawm ve lem lo thung. 

Covid-19 tuar nasa bertu pakhat chu dawr neia eizawngtute hi an nih avangin dawr inhawn chhawk kher loh hian hri darh dan hi a tidanglam tak tak chuang lovin a lang tlat a ni. 

Engtirnan- Cement lei i tum a, cement dawr no. 1 kha a inhawn loh avangin lei i ṭhulh phah lo. Cement dawr no. 2 leh no. 3 ah i kal tho a ni. A lei tuma kal chhuak zat chu a ngai reng a ni. Chutiang bawkin i mamawh dang lei tumin dawrah i kal a, i kal duhna tak dawr kha inkhar mah se hmun dangah an zawrh ve thona i pan ta tho tho a ni. 

Heti hian han en ta ila, dawr inhawn chhawk vanga mipui tlem tur leh hri leng tlem tura ngaihdan hi a dik kim zan lo deuh lo maw?

Tunah chuan dawrkaite hi an khawngaihthlak takzet tawh a, tuna Aizawla kawngpui lun laia dawr kai hi chuan kum 2020 ah hian 50% pawh dawr an hawng tling lo mai ni lovin 70% aia tam hi dawr an khar tawh ang. An eizawnna hi nasa takin a nghawng avangin dawr khar tur leh dawr in hawn chhawk tura rorelna hi chu en nawn vat a ngai lo maw? 

Dawr aṭanga Covid-19 in kai darh hi eng zat chiah nge maw ni tawh le?

Kan sumdawngte awm dan tur hi sumdawng ve lo, thla bi kima sorkar aṭanga hlawh la ṭhinten an rel sak a, heti reng reng chuan kan economy hian a tuar lutuk dawn tlat. 

Vairam hri kai tamna zawkah pawh dawr hawn ṭha zawka an hriat avangin Covid nena len dun an zir tawh zawk a ni. Mizoramah chuan sorkar hnathawk thla bi kima hlawh la hlirin midangte dinmun tur an rel sak a, Taxi driver te hloh zat pawh hi an chhut sak lo em ni, Lockdown an rel leh ṭhin ni? Taxi neitu leh driver hi a rumin an rum asin. Bazara inpho ve avanga ei ṭawk ṭawkte dinhmun hi an en tel lo em ni le? 

Dawr inhawn chhawk tih te, lock­down tih lam te hi chu sawi rik tawh loh theih ni se. Covid-19 dona atana No Tolerance erawh hmang kum tluan se a ṭhat zawk a rinawm e.