Kan danglamna kan hriat a ngai
Vai rama zuk chin châng hian India mi ni lo angin min ngai fo va, kan khawsak dan, inchei dan, duhzawng leh ngaihsan zawngah te hian India mipui tam berte nen chuan kan danglam hle. Kan nunphung leh chhungkaw inrelbawl dan te, kan khawtlang leh tualzal nunte thleng hian India ram dangte nen chuan kan inang lo hle.
Kan danglam bik avang hian dan leh thupek chungchangah te, India ram state danga ṭha hi kan state tan a ṭha ve kher lo a, chuvang chuan kan danglamna hi kan hriat loh chuan dân, zawm hlawh lo tak tak, tih zuzi leh mai mai a tam ang.
Sun control bel phal loh te, two wheeler-a mi phurh helmet khum ve kherte hi kan ram angah hi chuan a ṭha ber kher lo a nia. Mi state tana ṭha tak hi keiniah chuan kan khawtlang nun te, kan nunphung danglam bik avangte hian kan ramah chuan a ṭha ber lem lo tih hi kan dan siamtute leh kengkawhtute hian hria se, hma kan sawnin kan ṭha tlang a ni mai. Central lama dan an siamte hi kan khawtlang zia nen a inmil em tihte hi ngaihtuah hmasa ila, chutichuan dan zawm nuam, mipuite tan pawha ṭangkai kan nei thei dawn a ni.
Human rights chungchangah te, child protection chungchangah te hian hmun dang ang chiaha kal kan tum a. Miin anmahni khawtlang leh hnamzia atana ṭha tura an ngaihtuah hi kan hnam tan hian a ṭha kher lo. Hei hi kan social activist te pawh hian ngaihtuah deuh se, kan khawtlang mil leh rem tur anga kan insiam danglam thiam loh chuan emaw, dan leh inkaihhruaina central lam aṭanga rawn chhuakte hi kan hnam leh khawtlang ze mila anga kan kalpui thiam loh chuan kan khawtlang nun te, chhungkua te hian a chhiat phah zawk ang.
Hnuchham ina naupang enkawl chungchanga sorkar thil tih dante hi heng hnuchham ina thawktute tan leh naupangte tan a ṭha lutuk lem lo a nia. Kum an tlin china awm theih tawh loh ngawtte hi, hna an nei emaw, awmna tur chhungkua an nei emaw a nih loh chuan vakvai insiam belhna mai mai a ni.
Chuvang chuan kan danglamna hi kan hriat a, kan khawtlang nun leh ze mila kan kal loh chuan keimahni leh keimahni hi an intidarh ang a, kan intichhe tlang mai ang tih a hlauhawm hle.
- Ramropuia