DAN CHUNGA LÊNGTE!
Electric hi meter-in a chhianchhiah theih loh tura hman hi dan kalh a ni tih chu Electric Act 2003, Section 135, (subsection a, b,) hian a sawi a. Electricity Act 2003 section 55-na chuan electric hman reng reng hi meter dik tak hmanga teh vek tur a ti.
Tumah dan chunga leng kan awm lova, mi zawng zawng a huam a ni. Electric Department-a thawkte pawhin man chawi lova electric hman theih bikna an nei lo a, mi zawng zawng angkhat kan ni. Miin a hman man a chawi theih phawt chuan leh hmang tura a report tel a, department-in a lo pawmpui/ remtih phawt chuan hman theih vek a ni.
Tun hma Assam hunlai chuan Assam State Electricity Borad (ASEB) a thawkte chuan man chawi lova hman phal chin staff level hrang hrang tan an nei. Entir nan 4th Grade staff chu 30 unit vel an phalsak a, level sang deuh zawkte chu phalsak sang deuh pawh an nei awm e. Hetihlai hian ASEB khan Mizoram hi posting hrehawm (hard posting area) ah a ngaih vang pawh a ni mahna.
Tunah pawh hian corporation ṭhenkhat chuan FREE unit hi phal an la awm. Entir nan, NHPC chuan LOKTAK power house hmuna awma thawktute chu FREE unit hi 100 lai an phal a ni. LOKTAK DIL (lake) bul vel quarters a awmte an huam tir em ka hre lo. Ka hriat zawng chu hmun harsa bika thawkte chauh FREE power pek an ni.
Heng FREE unit an phalte hi a lo thlawna luang bo a ni lo. Kha corporation/ company khan FREE unit an pek man (cost) kha an chawisak a ni. Mizoramah chuan electric department-a thawkte tan posting hrehawm (hard posting area) a puan a la awm lo a ni ang.
Khawi hmunah pawh electric hrui aṭanga pawh ruk hi chu a hluar vek mai. Mizoramah zawk hi chuan langsar taka electric pawh ruk hi a tam lo. Hetihlai mek hian mahni in luma meter kal tlang lova hman ruk hi chu rin aiin a tam phian thung. Hei hi, Mizoramah chuan, electric bothlau tam chhan ber pakhat a ni maithei. Kan rilruah thil dik duhna a tlem a, vantlang zahna a tam zawk vang pawh a ni thei.
Man pe lo tur zawnga electric hman hi chu ruk rukna dik tak a ni. Department a thawk emaw thawk lo emaw dan loa electric hman hi phal a ni lo. Dan dik lova electric hman ruk hian, state pawn aṭanga lakluh leh state chhunga siam chhuah belhkhawm aṭanga hralh chhuah tur a titlem a, bothlau (loss) a tam a, a man hmuchhuak turin man sang zawka hralh a ngaih phah ṭhin. Dan dik lova electric hman hi bo se, hralh chhuah lehna man (rate) (consumer-te chhit man rate) hi a hniam thei zawk ang. Pathian leh Dan hmaah chuan mi zawng zawng hi ang khat kan ni e.
- Chhara