Tun lai thil awmzia (KṬP Conference zawha social media)

Mizoram kohhran lian ber Presbyterian kohhran ṭhalai pawl KṬP chuan General Conference chu May 5-9, 2022 chhung khan Kolasib ah hman a ni a. He ṭha­lai intawh khawm lian hunah hian zai ngaihnawm tak tak te, thupui zir pawimawh tak tak te, report chipchiar tak tak te a awm thluah rualin sawi zui hlawh ta ber chu Revd Chuauṭhuama sermon pathum kha a ni.

A bik takin Inrinni zana zu chungchang a sawi lan leh Pa­thianni chawnhnu inkhawma ram siamṭhatna a sawi chuan ti ti a siam zui viau a, ruling party lamah ei lotu an awm nual tih chu social media-ah kan hmu thei a ni tih kan hre vek a ni.

"Tunlai thil awmzia" thupui a sawia zu chungchang a sawi khan Revd Chuauṭhuama hian Grape juice thlengin a duh lo bur mai tih hi thil thar a ni tawh lo.

Congress hun laia zu zawrh a nih pawh khan a duh lotu langsar ber pawl a ni tih chu a thu ziak chhiar ṭhin tan chuan thil thar a ni lo a ni. Sermon-ah khan a han sawi chhuak kha political party ṭan lam nei, a bikin Congress lam chuan an lo helh hle tih chu social media lamah a hriat a, mahse Revd Chuauṭhuama hian a lo sawi tawh ṭhin kha a sawi nawn leh mai a ni lo maw?

Ram siam ṭhat a duh luatah khan ṭawngkam hriam tak tak a hmang nual a, ruling party MNF mi leh sa ṭhenkhat kha fing takin lo ngawi mai se a ṭha zawk tur a nih laiin MNF beihna ang hialah ngaiin Revd Chuauṭhuama lo bei let nawlh nawlh an awm ta nual mai tih Facebook leh Whatsapp lamah chuan kan lo hmu leh ta a ni.

Ram siam ṭhat duhna lam thu duhthawh takin a sawi a, amah hi pa extreme ve tak a nih avangin pastor dang sawi duh loh te, an sawi ngam loh tur te a sawi avangin sorkar a bei angah ngai pawl kan awm. Sorkar beihna ni lovin siam ṭhat duhna Pastor in a sawi chhuak tiin ngai ila, haw lovin insiam ṭhatna atan hman tum ni se a hlawk zawk ang.

Keini ang mi mawl ve tak pawhin kan hmuh theih chu Revd Chuauṭhuama hian party a bei lova, tumah a campaign pui lo. Mizoram ṭha zawk neih a duh avangin hlauh nei lovin a au chhuak mai a ni zawk si.

Social media aṭanga kan hmuh chuan Revd Chuau­ṭhuama thusawi avanga insiam ṭhat tumna lam ni lovin amah beih letna, a thusawi hnialna lam kan hmu tam hle tih hi tunlai thil awmzia chu a ni e.

- Maremmawia