Worship leh service hi

Zofate hi inkhawm kan taima a, ṭawngṭai taima fe fe pawh kan awm ṭeuh. Hemi zawnah chuan a thla­muan thlak khawp mai. Mahse a taka Pathian duhzawnga thawh chhuah lamah erawh kan sang hranpa viau lo niin a lang. Ṭawngkam dangin sawi dawn ila ‘worship’ ah kan sang a, ‘service’ ah kan hniam.

A ṭha berah chuan worship-ah leh ser­vice-ah sang ila a duh­awm ber ang. Mahse pakhat khat chauha kan chak dawn a nih rau rau chuan a taka thawh ‘service’ lama chak hi a duhawmin Pathian ngaihah pawh a pawimawh zawk hmel.

Pathian mi hman ropui tam tak phei chuan "A taka thawh chhuah dik pui hi Pathian biak dan ṭha ber a ni (service is worship) an ti tawh zawk a ni. Pathian biak inkhawm hi Pathian rawngbawl hna hlenna a ni e (worship is service) titu erawh an awm awm ka la hre rih lo.

Ṭawngṭai taima viau si a, a ṭawngṭai tamna chu midangte khenbeh nana hmang tlat leh Pathian aiawh, a chenpuite tan erawh entawn tur leh a rah tlan tur leh tem tur thil ṭha engmah nei chuang lo, mi rel leh buaina chawh chhuah peih tak kan nih chuan kan inenfiah a ṭul a ni.

Isua khan ṭawngṭai tur chuan min fuih ngei a, mahse "In ṭawngṭai hian ka hna in thawk tlingtla reng tawh e," a ti lo tlat nia. Inkhawm (worship)-ah chuan midangte hmangaih turte leh thuhnuairawlh taka Isua mizia pua mi dangte rawngbawl sak tur tein kan infuih ṭhin a. Mahse kan inkhawm ngunna hian chutianga thuhnuairawlh taka midangte chunga hmangaihna a taka tilang tam zual tura min fuih hneh tak tak si loha midangte laka inlak len, inlak mi tak nan leh induh phah nan lek chauha kan hmang a nih a, midangte hliam tuam damna atan ni lo midangte vuak leh delh beh a, chung tlak nana kan hmang a nih chuan kan va ṭhelh nasa dawn em! Chutiang a nih chuan mark petu leh endiktu chunglam lung kan ti awi ang em le?

Duh uluk ṭhin tak kan biak kan Pathian hi chuan kan ram zirna runte ang lo takin hminglamna roll call (inkhawm ngun) aiin lan chhuah tir (performance) leh thawh rah lang thei (workdone) lam hi a ngaih pawimawh zawk ka ring! Engle khawle worship (Pathian biak) leh a duh zawnga thil tih (service) hi in buktawk sela a va ṭha dawn ve.

A inbuk tawk lo a nih a, service lam eng atan mah ngai lova worship hi service tluantling emaw ti kan nih chuan Pathian mitah kan tla fel der maithei a ni. A chhan chu worship (Pathian biak) chu sawi loh amah rinna pawh hi thil tih tel lo chuan thi a ni, tih Bible-in a sawi tlat.

- J.Khuma