MBOCWWB hi tunge hrem dawn?
Dân lo anga chetna kan hmu tam tual tual a, chutih rual chiah chuan dân hmanga hrem tawk ta erawh hriat a lawi kan nei ngai meuh lo.
Kan hruaitupa berin engtin nge kan tih dawn kan la hre lo a tih hi hrem an tawh teuh dan ber ni mai awm a ni! Heti tak maia dân bawhchhiatte zalenna rama kan Zoram duh tak a lo chang ta mai hi ngawi renga en liam a har tluk zetin Kristian rama kan ni tih hi rin a har ta a nih hi!
Mizoram Building & Other Construction Workers Welfare Board chuan an sum neihte dân lo angin an hmang tih Vanglaini chuan thupuia hmangin Mizo mipuite min hrilh hria a. Sum kan harsa kan tih laia tiang mai maia sum hman ral a ni hi en liam mai har tak a ni. Mahse, Kristian inti rual awmna ram hian sualna hi an en liam leh mai maiin a rinawm!
Ṭhalaite hmakhua ngai intite hmalakna nep lutuk mai hian ṭhalai rual min beng harh rawh se.
Zirchianna pawh nei peih lo, sum siamna a nih tawh dek dek phawt chuan ṭhalai rual min halral hreh lotu Welfare inti ve si, engmah tak tak thiamna nei lo tura ṭhalai deusawh ngam Mizoram Youth Commission kan nei hi a vanduaithlakin a tenawm a ni tawp mai. An la zak map lo va, ka la insawifiah e te an la han ti ngam zawk chu a ni si a!
Welfare tia indin ve meuh si, welfare sa tih chiang taka kan hriatte hnenah a nuai tel sum an la han puktirte hi eng dân nge ni ngai a? Ṭhalai rual zingah Director PA, ITI Principal, MYC Secy., LEIT Director tih vel mai mai aia hmalakpui tur ṭhalai rilṭam kan kuh ṭun laiin a nei sa pêk an la han ni zui mawlh mawlh maite hi Revolution chhuahna tham a tling ta takzet a ni.
Sawrkar hnathawk, sualna lian thama inhnamhnawihte hrem theih lohna ramah hian eng chen nge kan la chen dawn? Kristian kan nih ang hian engtikah nge sualna hi kan huat ang a, a taka Pathian kan ṭih dawn? Sualna bul dik lo taka sum lakluh huat kawngah hian engtikah nge kohhran hi a harh ngam ang a, ruihhlo ni lo kawrapsawn do nân sum a thawh ve ngam dawn? Engtikah nge mipuite hian anmahni hmangaih tak taktu an hriat fuh ang a, an thlantlin ve tak ang?
Bawngkai sikret mai mai chauh man ngam lo va, dik lo taka thil titute hi engtikah nge sawrkar hian a man a, a hrem ngam ang? Engtikah nge MLA/ Minister, term khat a zawh hnua a hma aia a let 500% chuanga hausa lo va, mipuite zawk hmasawnna hmuhtir ngam MLA/ Minister kan neih ang? Ka hre lo, he kristian ram an tihah hian dikna, rinawmna leh Pathian ṭihna hi engtikah nge kan nitin nun kaihruaitu a nih dawn ka hre mawlh lo a ni e.
- Lalremliana Pachuau