MIZORAM HARH TA CHE (National Technology Day pual)

May ni 11, 2022 hi India pum huapa ni pawimawh ‘National Technology Day’ a ni a. Kum 1988 May ni 11-a Pokhran, Rajasthan hmuna nuclear test hlawhtling taka an neih ni denchhenin kum 1999 aṭang khan kum tinin India ram hmun hrang hrangah Science leh Technology lama thawk ṭhate chawimawina hun atan te, infuih tharna hun atan te hman a ni ṭhin.

Mizoramah pawh he ni hi Directorate of Science & Technology huaihawtin a thlazar hnuaia peng hrang hrang -Mizoram Science Technology and Innovation Council(MISTIC) , Mizoram Remote Sensing Application Centre(MIRSAC) leh Mizo­ram Science Centre (MSC) te , Mizorama Science NGO hrang hrang te, Zirna Ina zirlaite leh zirtirtute leh science lama tui mite nen hman a ni ṭhin.

India ram hian khawvel ram changkang zual ṭhen­khat la tluk lo mahse, khawvel ram tam tak aiin Science and Technology lamah hian hma a sawn chak hle a, khawvel huap pawhin dinhmun sang tak a luah tawh a ni . Hetih lai hian India ram state hrang hrang zingah Mizoram hi a hnufum ber pawl a la ni tlat mai!

Kan ngaihtuah zui atan, National Technology Day pualin Science leh tech­nology lama Mizo­ram kan ṭhanharhna tur ṭhenkhat a tlangpui chauh­in ka’n tarlang teh ang .

1. Mizoram hi India ram State-te zingah Science and Technology Depart­ment hran la nei lo awm chhun tlemte zinga mi a ni .

2. Mizoram Sorkara Directorate of Science and Technology leh a hnuaia autonomous body hrang hrangah hian thawktu an la indaih lo hle; hna thar siam leh hna ruak hnawh khah a har.

3. Mizoramah Sorkar hnuaia Science and Tech­no­logy Sector-ah budget a tlem ṭhin lutuk. Scientific research tih nan Science leh Technology-ah tun aiin sum dah tam ila kan ram tan investment ṭha tak a ni ang a, nakinah kan inchhir lo ang.

4. Mizoramah hian Election Manifesto-ah Science leh Technology lama hmasawnna tur lam hawi mumal tak a lang ngai meuh lo .

5. Mizoram Sorkar Flagship Programme-ah Science leh Technology-in hmun a chang tam lo ṭhin hle.

6. Mizoram Sorkar Department hrang hrangah scientific researh lam kan uar tawk lo a, scientific research base-a hma lak kan hlamchhiah fo.

7. Science leh techni­cal lam zirna college leh institution kan la nei tlem a, kan neih chhunte pawh duh angin a la changtlung tawk lo.

8. Central sorkar hnuaia science leh technical mite luh theihna hna hrang hrangah Mizo ṭhalaite kan lut tlem hle.

9. Central sorkara Science and Technology kaihnawih Ministry /Depart­ment hrang hrangte nen duh aiin kan la inpawh ṭha tawk lo. Central sorkar puihnain nasa zawka research project tih a ṭha.

10. Mizoram chhungah innovation leh intellectual property rights lamah chak taka hma lain, Science and Technology hian eizawnna hrang hrang thawktute leh kuthnathawktute a thleng phak tur a ni.

Khawvela ram nuam leh ram hmasawn, ram dang pawhin an chung en a, an ngam lohte hi Science leh Technology-a hmasawnte a ni, tih hriain i harh ang u.

- Dr. R.K. Lallianthanga