Thluaka sum lut

Rev Chuau­ṭhuama (Revd ka ti ve kher kher lo) thusawi kan sawi chhawn luai luai laia ka lo lak fuh ve em em mai chu 'THLUAKA SUM LUT' tih kha a ni.

Hei hi kan ramin tun lai hian hniang­hnar takin kan hmu mek a, thil hi pawisa hmanga teh vek ching, engkim mai pawisa pawisa pawisa ringawta teh ram hruaitu kan awm avang hian kan ram hi a nâ a ni.

Pawisa tel lova thusawi thei lo, pawisa tamzia sawi loh leh pawisa harsatzia sawi reng mai ram hruaitu neih te hi a vanduai thlak a ni. Lung hi a zing a, a chang leh pawisa tamzia kan sawi hnu lawkah sorkar hnathawkin hlawh an han la thei lo vel leh ang lawi si a, kalphung mak tak zawng a ni phawt mai.

Kan ram hruai­tuten an sorkar chhunga an tih leh hmasawnna kal thar min kawhhmuh sawi tur hre mang si lova, building thar, thil sak thar, phullem phah thar, thil siam thar, thil lungphum leh pawisa hmanna leh siamna remchang tak construction lam hlir min hlui reng chuan he ram hi a la piangsual zo dawn a ni.

Pawisa tam ber lah hi a puka puk a ni an ti bawk si.

Engvangin nge smuggling pawh kan hmuh sakhi ngam loh? Rev Chuauṭhuama khan chiang kek kawkin Kuhva tawlhruk hmanga sum siam a tamzia a sawi a, Police lal thu avanga man ngam loh a sawi te kha titi satliah emaw kan tih kha a lo va han mak thei ngai ve le.

Officer hausa tak tak tam takte hi thluaka sum lut an ni a, an hlawh zat kan chian em em ruala an hlawh aia sanga khawsa hi thluaka sum lut dik tak zinga mi an ni.

Mithiam bik leh hnathawk ṭha bik pawh ni lo chunga Kamrul-a'n hna a hmu thei mai ni lova a hmu tam lutuk te pawh hi a zung nena phoro a chakawm a ni.

He thil kan sawi rual chiah hian Congress sorkar lai kha han tlir kir leh ta ila, Restricted Tender zozai te kha thluaka sum lut tho hi a lo ni. Chumi thik niawm taka MNF lamin an han ti chhunzawm ve zat te, Minister ṭhenkhatin office pawisa chhe te thlenga an it anga sawi te hi thluaka sum lut a ni.

ZPM leh BJP te hi sorkar ve loh vanga fihlim mai mai ni lo se, tu pawh hian "Tangka sum ngainat hi sual tinreng bul a ni," tih hi sawi uar ila. Zu tih mai mai chu a ken tel ve pakhat lek a ni zawk.

- Malsawm-dawngliana