US-in Pathian a hria e!

In lo chik ve emaw, Presidential Inauguration-ah khan vawi ruk lai Pathian thu chhiara ṭawngṭaina an nei a. Inauguration official program ni hnih lek chhungin vawi 45 aia tam Pathian thu chhiar leh ṭawngṭaina an nei.

An rorelna in hnih, House of Repre­sentatives leh Senate-ah te pawh rorel apiangin Chaplain pahnih te hi an ṭawngṭai ṭhin a. An hma ami te tih dan a ni a. Kum 207 vel kalpui tawhin an sawi. An rorel khawl lian ber House of Representatives-ah te khuan Speaker zâwn (opposite) a kawngka lu chungah Mosia lim, banga târ chi, plaque an tih chu an târ.

President leh Vice President atan an lak luh zawh khan Inauguration luncheon an nei a. Chaw ei hmain Dr. Barry Black, Chaplain, United States Senate chu urhsûn takin "kan President thar tan kan rawn ṭawngṭaisak e. Lalpa, a thawhrimnaah te hlawhtlinnain malsawm la, a tawp thlengin kai hruai ang che" a ti a.

Rev. Patrick Conroy, Chaplain United States House of Representatives-in malsawmna dilin, "Lalpa kan President thar Donald Trump atan hian a bik takin malsawmna kan rawn dil e. Sual leh ṭha hre turin hriatna pe ang che, a ti leh bawk. Chaw eikhamah pawh a Pathian thuin tawpna an siam thlap a ni.

Presidential Inauguration kha han sawi leh thuak ila. Lal Solomona ṭawngṭainain Archbishop-in a ṭan a. Reverend Dr. Samuel Rodriguez-a'n rawn zuiin, tlâng chunga Isua thusawi a rawn chhiar. Pastor Paula White Cain rawn ding chhuak lehin, "He ram ropui tak hruai tur hian kan President hi finna pe ang che," a rawn ti a. Tichuan, Vice President leh President-i'n thu an tiam.

Thu an tiam zawh chuan Rabbi Marvin Hier-a rawn ding chhuak nghalin, "Chatuan Pathian, Donald Trump-a leh kan ram ropui tak, America hi malsawm ang che," a rawn ti nghal a. Billy Graham-a fapa a rawn ding chhuak vein, I Timothea bung 2 a mi, Pathian pakhat chauh a awm a, Pathian leh mihring inkarah Palai pakhat chauh a awm bawk a, amah chu mihring a ni, Krista Isua," tihte chu mitin hriat theih khawpa chiangin a rawn chhiar a. A paruk nan Bishop Wayne T. Jackson-a rawn ding chhuakin, "Lalpa, he hun ropui tak min hman tlântir hi kan lawm e, a ti tê tê a, malsawmnain a tawp. Jackie Evancho-in hnam hla a rawn sa a, an ṭin ta a ni.

An lak luh aṭanga ni khatnaah National Prayer Service an nei a. Hei hi President innauguration kharna a ni. Vawi 30 chuang Pathian thu chhiara ṭawngṭaiin President lak luh program an titawp.

Ni hnihnaah President Trump-a chuan a staff te chu thu a tiamtir ve a. Hetah pawh hian duh taka a ruat Chief of Staff thar Reince Prebus chuan Pathian thu deuh mai a sawi. "Tukina office ka kal chu dawhkanah Bible chang hi a lo awm a. Isaia 40:31 hi a lo ni a. 'Lalpa nghaktute erawh chuan an chakna chu an siam ṭha leh ang a; mupuite angin thlain an thlawk chho vang a, hah lovin an tlan ang a, chau lovin kein an kal ang' ... Pathian hnenah lawmthu ka sawi a. President Trump-a leh Vice President Mike Pence-a leh kan ram tana kan thawhna turah hian a venna ka dil a ni," a ti.

Saperation of Church and State an tih, Kohhran leh sawrkar dah hran hi a la run ber ni mah se, sawrkar thila an ṭawngṭai tam chhan chu Separation of Church and State hi Separation of God and State a ni lo, an tih tlat vang niin a lang. Chutih laiin keini Mizo te anga râu an ni ve lo a. Bible-in nun dan tur a sawi erawh an zâwm ṭha deuh.

Movie vela kan lo hmuh ang ngawt te hi an ni lo. A hmuhnawm nana an siam mai mai a ni. "F*** you" tih

ṭawngkam mawi lo tak te hi a tlangnel viau dawn emaw tih laiin, Trump-a tlin hlima protest-ah khan mipui hmaah Madonna-i'n thu a sawi a. CNN-i'n thu an puan laklawh pawh sawi loin an live nghal a. Madonna chuan "F*** you" a ti siah mai a. A duhtawk dawn emaw an ti a, an han nghak deuh a. Vawi hnih a tih lehnaah chuan CNN chuan an titawp hmak a. Thu puangtu chuan thupha chawi nghalin, khatiang khan a ṭawng dawn tih kan lo hre lo a, in mi hriatthiamna kan dil e, a ti.

Ṭhalai awm herh hi tam tawhin popular culture ngainatu tam mah se, mi pangngai chin khu chu rin ai hian an lo Pathian thu khawp mai a. An ti hluak lo nâin, keini ai chuan a thu an awih deuh.

- Remsanga, Mission Veng