SSA zirtirtute hlawh inhnialnaah buaina tam tak a awm hmel lo

SSA zitirtute hlawh thla nga (5) chhúng lak theih loh chungchang inhnialnaah thuí tak buaina tur a awm lem lovin a lang a. Thu inhmu tawn chiah lo, thil pahniha inpuh vangin kan buai mai mai niin a ngaih theih deuh tlat.

Social media, Facebook 'Zoram Politics Group I' ah mi pakhatin SSA lehkha pawi­mawh 'image file docu­ment' pathum a post chungchangah SSA hotupa state project director chuan police-ah FIR (complaint) a thehlut kha a ni a. An FIR thehluh chhanah Facebook-a post tu chu hrem tur emaw, a thil post chu thu a dik lo tih emaw lam a lang lem lo va, a mihringa zawng chhuak tura tihna a ni deuh ber awm e.

Facebook lama post-tu ‘Renga Kawlni’ chu Police te’n an koh angin, Dy. SP CID (Crime) hmaah January ni 9, 2017 khan a inlan a. SSA document facebook-a a post chu, a ṭhian pawh ni lem loin a mimal hnena a thawn (inbox), a post chhâwn mai a nih thu a sawi a. Chumi

ṭuma tel ve, Pu Lalruatkima MLA chuan Mizoram Legislative Assembly Session neih hnu­hnung ber, December ni 8, 2016-a Education Minister, Pu H. Rohluna'n SSA chungchang a chhanna leh SSA document chu a inmil lo tih a hriat thu te pawh Police te hnenah a sawi ve bawk a.

Parliamentary Secretary, Pu Josph Lalhimpuia Edu­cation changtu chuan Janua­ry ni 10, 2017-ah SSA chung­chang chu sawifiahin thuthar thehdarhtute a kawm a. Pu Joseph Lalhimpuia chuan Mizoramin Sorkar laipui

aṭangin September ni 29, 2016-a 1st installment sanction Rs. 1441.31 lakhs a hmuh chu November ni 22, 2016-ah SSA Account-a a luh hnuin, a tuk Nov. 23, 2016 ah District tina pekchhuah (release) a nih nghal thu a sawi a. Sum la bang zawng chu State matching share nena chhunfin a nih hnuah pawh, SSA zirtirtute thla khat hlawh a daih loh avangin sum chuang bang chu a duh apiang enfiah theihin SSA Account-ah dahṭhat a nih thu a sawi.

Hemi hnu January ni 17, 2017-ah Mizoram SSA Project Director, Pu Lalhmachhuana paw’n thuthar thuthar la­khawm­tute kawmin, SSA hlawh pek chhuah tur lehkha an ziahah document siam danglam vangin 2016 June leh July thla hlawh tur dilna an lo siam tawh chu, August leh September 2016 hlawh tur dilna angin a lang a. 2016 June thla hlawh, October ni 14, 2016 a pek tawh leh, 2016 July thla hlawh, November ni 23 a pek tawh hnuah pawh ‘August leh September 2016’ thla hlawh pek tur la awm si, pe duh lo angin ngaih dan dik lo a pianchhuah phah ta a ni, a ti a. SSA ducoment-a thla hnih hlawh tur (for the two months) tih chunga kutziaka ‘Aug & Sept.’ tih lo lang chu phuahbelh a nih thu leh, SSA zirtirtute hlawh pêk chhuah duh loh a awm loh thu a sawi bawk.

Pu Lalruatkima MLA chuan January ni 14, 2017 (Inrinni) khan Aizawl Press Club-ah SSA hlawh chungchang chu thuthar thehdarhtute hnenah a sawifiah ve ta a. SSA-in Finance Department-a thla hnih (2) hlawh tur sum an dilna leh, an dil anga sum an hmuh laia thla khat hlawh chauh thawktute pêk an ni chu an sawisel ber a ni, a ti a. Cheng nuai 1441.31 aṭanga thla khat hlawh pek hnua a la bâng nuai 594.11 leh a hmaa SSA account-a awmsa nuai 563.92 (belhkhawmin nuai 1158.03) chuan SSA-a zirtirtute thla khat (August) hlawh a daih vangin, Mizoram sorkar chu thla khat hlawh pe turin a phût a.

Opposition MLA Lalruat­kima chuan an Party Office-ah January ni 20, 2017 khan SSA hlawh chungchang a sawi-fiah zui leh a. Parliamentary Secretary leh SSA hotupain thuthar lakhawmtute an kawmnaah SSA Document te chu pawnlam mite tih danglam anga ngaih theih tura an sawi chu chhangin, SSA document chu finfiah turin Finance Department-ah January ni 18, 2017-ah Pu Vanlalzawma MLA nen an kal tih sawiin, file document chu an enfiah vek hnuah, document chu pawnlam mite siam danglam a ni lo tih an finfiah thu leh, a duh chuan Finance department-ah kalin enfiah ve rawh se, tiin, a cho let a.

Han khai khawm dawn ila:-

SSA Project Director leh Parliamnetary Secretary te’n SSA Document chu siam danglam, phuah belh anga an sawi hi a dik viau a. A tira computer lama an chhut luh bâk, a chung lama kutziak lo lang hi, mi tuin emaw a ziah belh emaw, hriat thiam awlsam nan a tarlang a ni thei a. A ziah belhtu chu tu pawh ni se, SSA lam hian September thla thleng thleng hian SSA hlawh leh thil dang Finance lamah an dil lo niin a lang.

Hetih rual hian Opposition MLA, Pu Lalruatkima’n SSA hotu te’n Finance lama thla hnih hlawh an dil hi, June leh July atan a ni lo a. Rs. 1441.31 lakh an dawn hma October ni 14, 2016 khan June thla hlawh tur Rs. 834.07 lakh chu an pe daih tawh a. November ni 2, 2016 khan Finance Deptartment (EC)-in approves expenditure sanction an pe chauh a. Chuvangin, Rs. 1441.31-ah hian proposed expenditure-a thla hnih hlawh tur, tia inziak hi July leh August thla hlawh atan tih chiang takin a hriat theih a. July 2016 thla hlawh, November ni 23, 2016 atan an pêk tawh avangin, thla khat ‘August’ daih an la neih; pe chhuak tura MLA-in a phût pawh hi a dik ve chiah si awm e.

Parliematary Secretary, Pu Joseph Lalhimpuia leh SSA Project Director bakah Congress Party thuchhuah; hemi pathum bakah, Pu Lalruatkima MLA-in vawi hnih a sawifiahna Statement zawng zawng han en hian, chuti teh chiama buaina tur hi a awm lem loin a lang tlat a. A nihna takah chuan SSA hotute hian zirtirtute thla khat (August) daih hi an la kawl hmelin a lang a. Chu chu Opposition MLA phut ang hian pe chhuak mai se, a ṭhat a rinawm a. Chutih rualin, SSA hotuten an ducument khawih danglam anga an sawi pawh hi a dik thoin a rinawm. Chutih rual chuan, Pu Lalruatkima MLA hian September thla hlawh lam kan sawi lo, ‘August’ thla hlawh hi pe mai rawh se, a tih pawh hi a dik hmêl ve leh chiah si a ni.

- Zobiakvela (Masena)