Ei leh bara intodelh kan tum dan kha...

Mizoram Chief Minister Pu Lal Than­hawla hoin Janua­ry 19 khan Mizo­ram hmun 40-ah Kuthnathawktute Ni hman a nih thu Vanglaini chanchinbu-ah hian kan lo hmu a. A hmanna pui ber Aizawlah chief minis­ter hoin hman a ni a, Pu Lal Thanhawla chuan sorkar depart­ment hotute’n ṭan an lak lehzual chuan Mizoram chu ei leh bara intodelhna ramah siam theih a nih thu a sawi tih in rawn ziak a.

Pu Hawla chuan Mizoram chu boruak ṭha, thlai chi tin ṭhat duhna ram a nih thu sawiin department hotuten tun aia ṭan an lak chuan Mizoram chu ram intodelhah kan chhuah theih thu a sawi kha a ni a. Khatiang thu kan hotupa berin a sawi mai kha a mak ka lo ti viau a, a chhan chu kan hotupa ber mai a hote, sorkar hnathawkte chungah a innghat pumhlum mai khan min ti lunghnur a; kawng lehlama chhut phei chuan a zahthlak viau bawkin ka hria.

Sorkar hnathawk­ten ṭan an lak lehzual a, mipuite kawng dik an kawhhmuh a, mipui an dah pawi­mawh hmasak chuan Mizoram chu ei leh bar leh sum leh paia intodelh ram kan ni ngei ang tiin a sawi.

Chief minister thu sawi hi a thleng dik a nih chuan nakinah an thawh rahah kan hmu mai dawn a, amaherawhchu kum kha leh chen kha Mizoram hian sorkar hnathawk leh ram hruaitu tam tak kan nei tawh a, a tu a te mah hian intodelh dan kawng min la hriatsak lo a. Tunah intodelh dan tur kawng kan CM in a sawi dan lah hi sorkar hnathawkten ṭan an lak viau chuan kan intodelh ve thei ang tih a la ni chauh mai hian a lantir chu - hruaitu mit delin min hruai ni ta berin a lang a, kan hmabak chu khuarkhuruma tlak a nih hmel ta viau mai!

CM thu sawi hian kan intodelhna tur kawng la bumbohzia a tilang chiang viau bawkin ka hria.

Ram changkang leh intodelh zawkte kan thlir chuan hna­thawktu an neih ṭhat em avanga intodelh ta lam ni loin an ram hruaitute inpekna leh thawhrimna, ram an hmangaih em vang zawka intodelh ta te kan hmu ṭhin.

Kan hotupa berin kan ram intodelh thuah mawhphurhna la ngam lo ni awm taka sorkar hnathawkte a burbun tlat hian kan ram dinhmun chhiatzia a tilang niin ka hria. Ram mipuite dinhmun chhiat ṭhata mawhphurhna la ngam lo hruaitu kan nei emaw tih theih tura CM berin thu a sawi hian mipui rilru a tihnual ang tih pawh a hlauhawm viau a ni.

Sorkar hna pui ber chu mipui venhim leh ram hmasawnna ngaihtuah a ni. Ram mipuite ei leh barah kan intodelh a nih chuan kan hotute thawh rah a ni ang a, tun anga thawh chhuah nei loa kan awm zel pawhin a mawh phurtu lian ber chu kan hotute tho hi an ni dawn lo’m ni?

- Ramhmangaiha