Rangkachak tuala lengte kha...
Kan hlain “Rangkachak tualah kan leng ang,” tiin Vanram nawm turzia a suangtuah a. Kan Mizoramah ngei pawh rangkachak tuala leng hi an lo awm tak tak a, kha rangkachak tlang 50 chuang bo/ bo loh thu kha a zuzi dawn em ni? he dikna duhna ramah hian tiin ka lo suangtuah ve a ni.
Rangkachak bo thila inpuhnaah khan Sipai officer chu suspend a ni a, lock up ah pawh an han dah ve ren rawn a, tunah chuan an bail a, a chhuak leh tawh a, sipai an man zawng zawng pawh an chhuak leh vek tawh. Keini dan hre thuk ve lo tan chuan, “Thil sual titu na na na chu hrem mai awm, tantir mai awm’ kan han ti a, dan lam chuan ‘A thil sual tih hi finfiahna a awm lo, thuhretu an awm lo’ an han ti leh ang a, chuvang chu a ni mah na an chhuah leh ta a.
Ka rilrua riak reng pakhat chu khatah khan mi ṭhenkhat khan, “Rangkachak kan phur a, Zampuimanga Lungphun bulah silai nen min lo tidingin min chhuhsak,” kha an ti a, chanchinbu lama kan lo chhiar danin, khang mite khan dan lova rangkachak an man kha chu an inpuang chu a ni ber lo’m ni? ka lo ti ve a, chuti a nih chuan anni khan an thiltih kha an puang ta a, anni kha jail-ah an tang nge an chhuak ve ta tho, tihte thlengin ngaihtuahna a vak vel a ni.
Heng mite hi tang hrim hrim se, hrehawm takin awm se ka tihna pawh a ni lova, mak deuh mai chu a hunlaia kan buaipui hlut, chanchinbu lam pawhin vawi duai lo an ziah lan, internet lamah pawh zawng ila English pawha news lama an ziah sup sup kha heti hian kan hre lo tlang ta mai chu a nih si hi mawle ka unau! Keia mak tih ṭhin chu mipui nawlpuiin engmah kan hre lo a nih pawhin kan media lam tal hian in umzui leh dawn lo em ni? tih hi a ni a.
Rangkachak chu tlem te ṭhi leh zungbuna an siam pawh a man a to tham si a, rangkachak tlang 50 chuang rukbo leh insuamna thil sawi luai luai ni si hmawrbawkna mumal awm lova a reh zui ta vang vang mai te, a kaihhnawiha mihring an man Vai leh Mizote an zalen fai leh ta vekte hi rilru chuan a ngaihtuah zui zel a. Dan kan hriat loh avangin sawi zui ngaihna kan hre lova, dan bawhchhiaa ziah te hlei hlei hi a hlauhawm a, dan hre mi khan heng thilte hi han ziak ula mawle.
A thu hrimin politics leh Pathian thu ni lote pawh hi vei ve deuh chu a ṭha lo maw? Rangkachak tuala lengte chanchin hi kei ka ngaihtuah a nia, thih hnua rangkachak tual tak taka kal loh te hi ka hlauh zawng tak a ni!!!
- Marama