KA VARTIAN MUMANG

Hman zan chu khua a lum hle mai a, mut a chakawm lo bawk a, Football inkhel en pahin thingpui sen no thum lai ka in a, ka meng rei ta hle a. Zing dar 1 a lo rik chuan ka mu ve ta a. Zing dar4 velah ka zunchhuakin min ti harh a, ka va inthiar zo chu a la hma bawk nen ka meng tlang peih lova ka mu leh ta zawk a.

Chutia ka mu leh chu mumang ka lo nei ta a. Ka mumangah chuan Aizawl veng pakhatah hian pa fai veng vawng, a hmel en reng pawh a zahawm tak, smart zaih mai hian min lo hui a. Tunge a nih ka hre lo, khawi lam aṭanga lo kal nge a nih pawh ka zawt hman lo. A hnen ka thlen chuan fiah fai tak, ṭawngkam fel takin thu min hrilh mawlh mawlh a. A thu min hrilh zawng zawng erawh ka hre seng tawh lo, ka hriat chhun ka han tarlang ang e.

1. Mizoramah hian lung (heart) ṭha lo in tam hle mai a, phai lama refer tawk pawh in ṭhahnem tawh hle. Tuna lung lama doctor in neih te hi an rintlak em em a ni. Phai lam aṭanga lung doctor thiam lo kal ṭhin te ai mah hian an thiam zawk, ring ngam rawh u.

Phai lam aṭanga doctor lo kalte hian an duh pakhat chu - sum siam nan an hmang che u a ni, hei hi mi tam takin an hre si lo. Khawpui leh thingtlang lama mi rethei sum an laksak ṭawk ṭawk ṭhin. Pacemaker vuah ngai miah lo pawh vuah a ngai an ti a, tin, vuah ngai pawh Rs 3,00,000/- Rs 4,00,000/- sen na tur ah Rs 6,00,000/-, Rs7,00,000/- te an bill ṭhin a ni mai thei. Hengho hian an khawngaih miah lo che u, lo fimkhur tawh rawh u.

2. Mizoram hi Kristian ram in inti a, a dik tho. Biak In sak ropui leh nalh lamah Kohhran hi in inel niin a lang a, hei hi thil ṭha tak a nih rualin thlarau lamah in ṭhang lian thei si lo, a pawi a ni. Agriculture lama hmasawnna tur, mi rethei leh harsate hnena a pung tlem zawk a rulh tur NABARD-in Loan a pek ṭhin ang hi kohhranten Agriculture Loan angin NABARD aṭangin Loan an la a, Biak In sak nan an hmang daih a, Kohhran hian an ti dik lo a ni, ti dikah an in ngai tlat si!

Kohhran hian a tih loh tawp tur a ti tlat mai a, hei hi a pawi em em a ni. Nghawng ṭha lo tak a neih chu Kohhran memberte-ah lang lutuk si lovin inthlahdahna, tisa leh thlarau lama ṭhan a tiṭhu a ni. NABARD hi chu lo leh huan neite tana buh leh thlai lama intodelhna tura sawrkar ruahhmanna a ni a, Biak In sak nan a hman tur a ni lo.

3. Mizorama roreltu zingah mi dik, Pathian ṭih tam tak an awm laiin Pathian hming lam si a, a taka ṭih si lo eng emaw zat an awm a, hei hian Pathian lung a ti awi lo a ni. Pathian ṭih tak tak se la chuan mi rethei chhiah pek khawm hi an duh duhin an chalai kual lovang.

Tun ang renga roreltute an awm chuan ram hmasawnna a ṭhang duang thei lovang. Kohhrana chanvo pawimawh tak tak neite pawh an bang chuang lo hi a mak a ni. Ringlo mi state pawh development-ah chuan engtikah mah in tluk lovang, thawhchhuah in nei si lo, chawmhlawm state in ni reng mai ang. Mipuite lah sum tlemtea lei in awl si, Kristian ni si, in dazat lutuk, thlem sam Kristian in ni e. Kristian chu rinawmin nun nghet a nei tur a ni.

A duhtawk a sawi a, a kal ta daih a. Mulco bawnghnute phur tur tlan ri chuan min tiharh a. Ka mumang chu mak a ti em a, ka hriat chian chin ka rawn ziak ta a ni. A dik leh dik loh kei chuan ka hre lo, mumang mak tak chu a niin ka hria.

- H.L. Thasawta