Minister-te leh An Fachuam
Kan Chief Minister berin amah leh a Minister-te eiruknaa an fihlim thu hi a sawi ṭhin a, hetia han thlir mai hi chuan, “A thil sawi hi a dik tak tak a nih hi, eirukna lamah Congress hi an fihlim hle mai,” tih mai awl tak a ni. An hming zawna pawisa an lakna uchuak tak kan hriat loh hian corruption-a fihlima sawi theih an ni a; amaherawhchu corruption lian zawk hi an hming zawna hmeh bel theih ni lo hian a inzam thuk viau thei zawk lo maw, tunlai thil kalphungah hi chuan? he zawhna hi chhanna nei nghal lo mah ila tunlaia hna inpek dan kalphung hi tawi te hian hrilhfiah i han tum dawn ang hmiang.
Tunah chuan a fing chin chuan ‘fachuam’ leh nauchuam’ hi an nei vek tawh a, kan Minister te hian hetiang ‘mifing leh fel’ hi an nei deuh vek. An department hnuaia hna awmte hi heng ‘mifing’ hian a Minister aiin an hre hmasa a, a ṭhente phei chu hengho hian anmahnia an zuk hai chhuahte pawh a ni thei hial awm asin. Tichuan, heng hna awmte hi contractor hrang hrangah an sem darh vak vak lova, a lian chin thawk tur hi ‘fachuam’ an nei ta vek a ni. Heng fachuamte hian Minister te hi eng nge an pek let kan hre ve phak lova, an pe let nge let lo pawh keini chuan hre ve lo mah ila an innel a, an inhaw lo viau ṭhin asin.
Entirna han sawi ta ila - Rural Development Department leh Home Department hnuaia hna lian thawk thei bik riau an awm hrang a, UD&PA leh Sports lama hna lian apiang deuhthaw thawk thei bik riau an awm ve leh bawk ang. Heng mite hi chu chhuhsak hleihtheih loh an ni a, chutihlaiin an department chan bik hi an inkal pawh zen zen lo a, hei hian ngaih a tiṭha lo angreng khawp mai. Supply pawh hi hetiang deuh chiah hi a ni a, supplier chuam an nei hrang ṭheuh emaw tih mai tur hi a ni a, heng mite hian an Minister puchuam ṭheuhte hi chu an nelin an tilawm thiam hle a ni.
Tichuan, Minister-te chu corruption-ah an fihlim ta em em mai a, ziakah a fel thlap a, kawng zawh pui luai luai turin hmingchhiatna an nei bawk si lova, hei hi corruption a ni ve lo a nih pawhin fachuam neih leh puchuam neih hi chuan ngaih chu a tiṭha mawlh lo.
Rilru hi a tibuai a, kan rilru buaina mai mai lah hi FIR leh CBI han punna tham a ni mang si lo!
- Maramtea