Chapchar Kût bawk

Kum tin Chap­char Kût kan hmang a, a hman dan chung­changah sawi­selna a awm ziah a, kuminah pawh kan hmang leh ang a, sawiselna a tam leh viauin a rinawm.

Chapchar Kut lawm dan tur duang­tute lam hian thil thar han reh chhuah tur hi an hre thei hlawl lo niin a lang a, chu mai bakah ṭhenkhat hi chuan sum siam nana hman phêt kan tum niin alang bawk.

Chapchar Kût kan hman dan hi kût dang nen kan hman dan a inang ṭhum mai bawk a. Ṭhal Favang Kût te, Anthurium Festival te, YMA-in nikuma Remna Ni programme an siam dan te a inang tlâng deuh ṭhup mai a. Kût dang pawh hmangin ila Chapchar Kût hman dan ang deuh bawk hian kan hmang leh thoin a rinawm. Kan chhehvela hnam dangten kût an lawm­in, a programme an siam dante a puiin, ralkhat aṭanga lo hriat ve ngawt pawha kal chakawm khawpin an siam thiam a. Keini hi chuan chutiang chu kan la hlat hle.

A dik chiah chuan tuna Chapchar Kût kan hman ṭhin dan hi chu hawkdak takte nih lem loh chuan kal a chakawm tam lo a, en ve hrim hrim pawh a chakawm lem loh. A landanah chuan ropui tak a, hnam dangte tan pawha tel leh en chakawm anga lantir ai chuan Chapchar Kût lawmna atana sum dah aṭanga hlawk­pui tumna lam a tam zawk hmel hle. Hetiang a nih chhung chuan kan kût hi a ropui tak tak thei lo ang.

Kum 2013 khan Chapchar Kût lawmna atan cheng nuai 20 lai mai Aizawla hman tur sanction a awm a. Stage siam nan ringawt cheng nuai 3 hman a ni a, VIP leh official te ei leh inah cheng nuai khat hman a ni bawk. Heng sum senna langsara sum sen zat hi duh ai chuan a tam deuh mah mah a, hlawkpuitu dang an awm ang em tih theih a ni. Kuminah pawh kan hmang leh dawn, stage siam a ngai hranpa tawh lem lo a, mipui hip zawk theih tura sum sen tam ni ta se a ṭha ang.

Ruahman tel ṭhin se ka tih chu mipui tam zawk kût lawmnaa entu ni lo a, tel ve nih theihna turte hi a ni. Nisa hnuaiah mi lâm kan en a, tutute emaw thusawi ngaihthlak a, tlai lama zaithiam zai hun nghah ngawt ngawt mai kha a ni. Thusawite hi a tam mah mah em? Thu an sawi rei mah mah em? Sorkar chak tak... han tihna turte a ni em? Mipui kût a ni a, mipui kuta dah thiam a ṭha. Official an ṭhu tuar maite hi Kût lawmnaah chuan a pawimawh lem loin ka hria.

- Lalhrilliana Ralte