TEII NGE PI TEI?

Hmanlai: Ziak leh chhiar kan thiam tirh aṭangin Tei tih hi Teii an lo ti ṭhin a, hun bul lamah thumal dik tak nihphung hi man kim hleih theih a ni lo a, rinthu titiha kal an ni. Mizo leh Vai Chanchinbu tih aṭang ringawt pawh hian thumal nihphung tam tak hriat nghal vek a har turzia chu sawi tam ngai loin a chiang mai (A AW B siam mah tih nak alaiin!).

Hemi kan sawi hian dem tur kan zawng tihna a ni lo a, dem te chu sawi loh bul min ṭansaktute hi sawi hleih theih loh khawpa fak tlak vek zawk an ni. An hriat dik loh kan chhawm zel erawh chuan kuk fawk tlak kan ni thung ang.

Chhuanlam: "Kan lam rik danah Tê-i kan ti lo a, Teii kan ti" an ti a; ni e, a dik. Lalrinhlûi chu Mahlûi kan ti a, Mahlû-i tia lam rik chang awm mah se, kan han titi tak tak a, Mahluii tih lam hawi hian a ri thuai mai. Chutiang chuan ri mah se Mahluii tiin kan ziak lem lo, Mahlûi kan ti mai.

Lalhmuchhuaki pawh Hmûi kan ti a, Hmû-i tia a dik taka a rik chang a awm mahna, Hmuii tih angin a rik chang a tam zawk. Chuvangin, "Tê-i kan ti lo, Teii kan ti" tih chu chhuanlam a tling ta lo a ni. (Teii tih sawi mawi duh vangin Hmûi tih leh Hlûi tih khi fet deuh taka i lam chhin i lam chhin chuan ‘i’ pahnih hi a ri zâwn kher lo ang; mah se, rawn sawi chhuak ta lo ila i lam liam puat si ang.)

Ziah dan dik: Mi­hring kan inkoh duatna chi khat ‘Tê’ tih hi hmeichhia an nih chuan a tawpah ‘i’ a awm belh a, mipa a nih chuan a tawpah ‘a’ a awm leh mai a lo ni. ‘Teia’ ni sa ve hrim hrim an awm a nih loh chuan Têa a ni a, chutiang bawkin a hmeichhe version chu Têi. Têi tia ziah vangin ‘tê’ chin chauh lam bun chut tur tih a awm lo, a lam dan pangngai kha a tawk.

Miin ram kalsiam an her laiin ‘i’ pakhat zawk tur tih mai mai kan chai tâwk a ni ve miau si a le!

- Rempuia R. Lûtmâng