NEW AIZAWL

Khawnge mahni vei zawng zawng hi han auchhuahpui ve leh ṭhin ila, tu pawi mah kan sawi em lovang chu.

Aizawla piang chiah chu nimah suh ila, pi leh pu aṭanga kan lo awmna a nih tawh avang leh, kan seilenna hmun a nih avangin ka in ti Aizawl ve viau phawt mai a. Kan naupan ve lai leh tun te hi chu ka hisap phak bakin a changkanna leh leh mihring pun lamah pawh a sang chho chak hle a ni.

Kan naupan lai chuan veng ṭhenkhata mitthi emaw, sarthi kan tih ang chi te hi kan inhre pawh vek a, kan hlau thei hle ṭhin. Tukual lui te, Chite luite pawh khatih hunlai kha chuan sangha te manin tui kan cheng bawk ṭhin a, kan school bang Infiamna hmun ber a ni ṭhin. Lui lian tak kha a la ni a, nuam hi kan ti thei khawp mai - tunah erawh chuan a lui hming chauh hi a ni tawh emaw tih mai tur a ni ta.

Aizawl hi a tir aṭang khan tun anga khaw lian leh mihring pung tur ang hian an lo ngaihtuah ngai lo em ni ang tih hi ka ngaihtuah ve mai mai ṭhin. Mi angin ram te fang zau ni lo mah ila, khawvel hi internet khawvel a nih tawh avang leh, commnication-a kan ṭhan em avang hian khawi ram leh khua mai pawh hi kan awm hmun aṭangin kan lo hmu ve thei tawh a ni.

Europe ram te, America ram te kan thlir chuan khawpui plan hi an lo nei ṭha em em mai bik a. Awmze nei leh in ang tlang tak insak leh compound ṭha tak nena engkim plan vekin a awm a. Keini khawpui ve thung chu compound neih chu sawi loh, in pawh in si chet in kan sa a, a bit thei ang berin kan khawsa a nih ber hi maw.

Garrage nei mumal chu tlemte an ni a, compound nei ṭha tak chu chhiar tham lek an ni maithei bawk. Chutih laiin lirthei lah a ni telin a pung tual tual a, tunah chuan two wheeler tan pawh tlan a harsa ta hle mai. Kan khawpui kawngpui a zau chuang si lo, lirthei a pung zel bawk si a, a manganthlak lam chu a ni ta. Chutih laiin a khawpui chhungah kan in ek chhe beng a ni ringawt a. In insi chetin in kan sa a, ekin hmun tur takngial awmlo khawpin kan chep tawh a ni.

Tui paihna ṭha kan neih loh avangin leh bawlhhlawh kan paih fimkhurloh avangin tuihawk a luang dul dul a, vairam kan sawi thin ang maiiin kan tuihawk te hi a tenawm zo tawh a ni.

Mi ṭhahnem ngaiten khawpui faina kawngah theihtawp han chhuah bawk ṭhin mahse, kan khawpui chep lutuk hian harsatna min siam a, kan changkang tawk lo nen, hmasawnna leh changkanna te a zuang chak si a, a luhaithlak ta hle. Ka hmuh danah chuan kan khawpui chhungah hian kan leng tawh lo a ni ber mai. Sorkar hmalaknain kawng chhawngte siamin, rope way te pawh han service ta se, Aizawl khawpui ang rualrem lovah chuan enge a an ang le? Kan thawl phah ngut ang em maw?

Khawpuia pem lut kan awm reng a, mihring kan pung reng bawk si a, kan hmalam hun reloteah hian kawng hrang hrangah harsatna kan tawk nasa lehzual dawn a ni. In hmun zim te te nuaih tam takin kan lei a, kan in hnawh chep tulh tulh mai chu a ni.

Ka rilrua ka lo suangtuah ve na ah chuan New Delhi te ang khuan New Aizawl siam hi a hun tawh hlein ka hria. Sorkarin khawpui zauhna turin ruahmanna fel tak siam se la. Khawpui plan fel tak neiin, sorkar hmunpui tam tak hi dah ni bawk se la. Tuna Aizawl angah hi chuan reiloteah khawsak ngaihna hi a awm lo thuai dawn. Hetianga bit lutuka kan awm hi a hrisel loh bakah, leilung chhiatna kan hmachhawn tam tulh tulh dawn a ni.

New Aizawl kan siam a nih chuan Europe ramte ang deuh a plan felfai nei a, ruahman a nih chuan khawpui thar nuam tak leh changkan tak kan nei ngei ang. Miin kan bawh ruih ruih mai dawn a ni. Chung khawpui thar siam pawh chu kan luah khat rang khawp ang. Tuna kan Aizawl city anga chep tak ni lo, garrage, parking leh kawngpui nuam leh zau zawk awm thei tura kan ruahman ngat chuan khawpui nuam tak kan nei thuai ang. Tuna Aizawl hi chu a hlui rup mai dawn a ni. Thalai lehkhathiam leh changkang zawkte hian hetiang ngaihtuahna hi kan neih a hun tawh hle.

Tuna kan khawpui hi chu chei tlak pawh niin ka hre tawh lo. Kawng zauh ngaihna a awm tawh lova, in lah a insi khup a, kawng hnaih takah in kan sa deuh vek bawk si a ni. Tuna kan khawpui chei tuma beih beih ai chuan Aizawl khawpui zawm tho si a, New Aizawl kan siam a ngai tawh a ni ber. Enge in ngaih ve dan le?

- Reuben Lalnunthara Hnamte