Kum 35 hmel hmu tawh Mizoram sorkar

Mizoram hi state a nih hnuah tluang tak leh buaina em em awm loin kum 35 a kal ve mek a, kum 35 chhung hian sorkarin hmasawnna hnathawh leh hma­sawn tura ruahman­na tam tak a nei tawh a, mahse, ram mipui hian innghahna tur hmasawnna rintlak kan la nei mumal lo hle.

Sorkar laipui leh state sorkarin hmasawnna tur scheme ṭha tak tak an lo kalpui tawh a, mipui hmasawn nan sum tam tak ruahman a ni ṭhin. Hengte hi a nihna tur ang taka hman ni vek ta se tun dinhmun aia sangah hian kan awm kan ring ṭheuh.

Chutih rualin a nihna ang taka hman a nih hma hian pawh pên ṭhin a ni tih a thawiin kan hre fur a; tuin nge tih leh khawiah nge hman ṭhen a nih ṭhin tih hi zawhna pawimawh tak, chhân harsa tak ni si a ni.

Sorkarin sum a neihte hi chhiah hrang hrang aṭanga lak khawm a ni tlang­pui a, sorkarin amah a inenkawlna tur leh mipui hma­sawnna atana hman tura duân ṭhin a ni. Heng sum te hmang tur hian sorkar hnathawk (government servant) peng hrang hrang a kaltlang a ngai a, hetah tak hian ram hmasawnna tura thil dik leh thil dik lo tih theihna a awm.

Kan ram din­hmun en hian eng political party pawh­in sorkarna siam se, politician-te'n eirukna thila an thurualpui theih leh an thunun theih sorkar hnathawk kan tam a ni lo maw?, heti em ema Mizoramah eirukna leh thil dik lo tih hreh lohna a hluar tâk.

Kan sorkar hna­thawk zingah mi ṭha leh fel tam tak an awm ang, chutih rualin kan ram dinhmun thlirin thil dik lo ti hreh lo pawh an awm tih a hriat theih. Tun aia nasaa hmasawnna tluan tling a awm theih nan hian sum leh pai tam tak aiin thil dik lo dodala ti lo ngam leh, transfer nih ngam, mipui tana sorkar hna thawk tak tak hi kan ramin a mamawh ber zinga mi a ni.

Rorellai sorkarte chu an inthlak ṭhin, mahse sorkar hna­thawkte erawh in pension hma zawng hun in nei. In pension hman hian kal dan dik lo siamṭhat theihna hun in la nei a, transfer emaw hotute hauh emaw huamin thil dik zawk tih nan hun inla neih lai hian ṭan han la mawlh teh u.

- Johny Chawngthu_95