Sorkar hnathawk leh pawn lam thil
Aizawla Veng lian tak pakhata Kohhran Upa chu sorkar hna a thawhlaiin officer lian a ni a, ama insawi dan chuan, “Inkhawmpui hi ka kal kim deuh vek a, mitthi vuina hi kan vengah a nih chuan ka kal deuh vek bawk,” a ti a, a ngaihsanawm hmel tehlul nen office-a a hnuaia thawkte chuan an pu chu hetianga a kal hian leave a la ngai miah lo an lo ti ve thung. Sorkar office-a kal reng chungin, chawlh la si lovin kohhran inkhawmpui leh mitthi vuina a kal kim thei a nih chu.
Hei hi chu entirna pakhat angah ngai ta ila, Mizoramah hian mahni hnathawhna (a bikin sorkar hnathawk) aia chhiatni ṭhatni leh kohhran programme ngai pawimawh zawk hi sawi tur an tam khawp ang. Heng zingah hian kohhrana mi challang hi a tam zawk an ni ang a, ngaihtuahna a ti kal thui a, sorkar hnathawk nih vanga mahni hna kalsana hmun danga ‘in hman’ hi danin a phal loh chuan dan bawhchhia chu an ni ve mai lo em ni?
Ngaithuah tithui tak chu Central YMA leh MHIP anga inhman hi a ni. Anni hi kan mamawh si, an tel lovin kan ram kal dan hi a kim thei si lo, heng pawla sorkar hnathawk awm vete hi engtin nge an hnathawhna hmunah hian an awm? tihte hi ka ngaihtuah.
Zirlai Pawl leh Political party lam hi chu full time worker ang deuh an ni a, MHIP leh CYMA-a sorkar hnathawk awmte erawh hi chu an eizawnna lamah chuan hmuh tur an vang ve pharh dawn tih a lang reng a, han siam rem vel hi thil hautak a nih ka ring.
Sorkar hnathawk ni chunga social worker, sorkar hnathawk ni chunga NGO lama mi challang, sorkar hnathawk ni chunga pasalte/ nupuite/ fate eizawnna thila vawn fung chelhtu ni ve awma lang hman reng, sorkar hnathawk ni chunga evangelist ni theite thleng hian ngaihtuah chu a ti thui takzet a ni.
Sorkar hnathawk ṭhenkhatte phei hi chu an eizawnna lama an tel phak lohna tur committee hrang hrangah NGO leh kohhrana an nihna angin an han meeting a, thil inkawkalh deuh deuh hi chu Mizoramah hian kan thlen tir chu a ni.
- Lalrammawia Zadeng