Khawvel chen dan ṭha
Thuhriltu 11:9, 10:- “Ṭhalaite u, in ṭhat lai chen ula, in la naupan viau lai hian hlim rawh u; in thinlung duh zawng chu zawm ula, in mitin a hmuh chak zawng nen chuan; amaherawhchu, chungah chuan Pathianin ro a rel dawn tih hre reng ang che u”
Ṭhalaite khawvel: Khawvel hmasawnna leh changkanna, a nawmna tak tak pawh phatu chu ṭhalaite hi kan ni. Keini Kristian ṭhalaite pawh hi khawvel chen tur kan ni a, kan chen pawh Pathianin a phal a ni tih Thuhriltu 11:9, 11 ah kan hmu. Mahse, Pathianin kan chungah ro a rel dawn. Kristian ṭhalaite’n khawvel kan chen dan tur chu engtin nge ni ta ang?
Lal Isua tel loin: Nula tlangval nih a, mahni tawka hmel ṭha leh ‘luck’ nih ngat chuan Lal Isua tel loa khawvel chen hi a chakawm duh khawp ang. Setana hian chuti ang ti tur chuan thiam takin min lo thlem chamchi bawk ṭhin. Lal Isua tel loa vanglai tawite chen a, hmeichhiat mipatna, zu leh sa leh ruihhlo tinreng nena vanglaini chente tawpna chu over dose, AIDS adt te a ni ṭhin. Hlima nia an hriat chuan beidawnna vawrtawp a thlen a, an khawngaihthlak takzet a ni.
Lal Isua nen: Lal Isua nena vanglai chen hi ngaihzawngte nena chen aiin a hlu a, a tlo bawk. Lal Isua tel loa khawvel chentute chuan kum 10/20 emaw an chen a, an thlarau nun phei chu beidawnna hlirin a khat ṭhin. Lal Isua nen erawh malsawmna tam tak kan dawng a, chatuan nunna neitu kan ni bawk si a, a va ropui em!
Nun hlimna thuruk min pe a, rilru hahna nei miah loin zanah tui taka kan muhil te hi Lal Isua kan neih vang a ni. He khawvel natna khirh ber ber leh doctor-te tih dam theih loh natna pawhin min tlakbuak mah se chatuan nunna min petu Lal Isua nen chuan engkim kan tithei a, kan natna zawng zawng pawh a ni chuan min tihdam sak ṭhin.
Kan taksa damna min pek loh chang pawn’n kan thalrau damna min pe a, kan mamawhna apiangah min awmpuiin min chenchilh tlat zel a ni.
Missionary ni ve rawh: Lal Isua nena khawvel chen hi a va hlu em. Kan ṭhalaipui he thu la hre ve lote hi ṭhahnem ngai takin i hrilh ang u. Lal Isua’n min hmangaihzia te, Lal Isua nen hian kan ṭhatlai hi a chen theihzia te hi hrilh zel ang u.
Lal Isua nena khawvel chen hi khawvel chen dan ṭha ber leh hlu ber, chatuana nunna neihnna a nih thu hi a hrilhtu leh kawhhmuhtu, zitirtu ni turin ṭhahnem i ngai zual ang u. Hmusit leh endawng mai loin, ‘Missionary’ rilru puin Lal Isua nena khawvel chen nawmzia hi a la hre ve lote hnenah i hrilh mawlh mawlh ang u.
- Rinfela Zadeng