ZNP hian Office-a an thu tar hi siam Ṭha se...

Zoram Nationalist Party (ZNP) hian an Party Office, an hotupa (President) ṭhutna hnung bangah hian Pathian thu ni awm taka lang, Bible thu nena inmil si lo, Bible bung leh chang nen meuha tar an nei a. He an thu tar hi TV lamah te, chanchinbu lamah te vawi duai lo a lang tawh a, ka ngaimawhna a rei ta hle.

Ṭhenkhat chuan kan lo chik mai thei a, chik lem lo pawh kan awm thei bawk. An thu tar chu hei hi a ni. "I chakna ni lovin, I thiltihtheihna ni hek lovin, Ka thlarau zawkin le" Zak. 4:6 tih hi.

Hetiang tur zawk hi niin a lang.

1. Inverted comma (") dah an duh a, Bible bu, bung leh chang dah tel an duh a nih chuan 'I' hi telh loh tur a ni. 'I' hi Bible-ah a lang tel lo a, 'I' telh leh telh loh hian a kawh a dang daih a ni.

2. 'I' tih hi an dah tel ṭalh duh a nih chuan, inverted comma hi dah tel lo se, Bible bung leh chang pawh hi dah tel loh tur a ni ang.

Miin Bible bu chhung thu an la chhuak duh a nih chuan inverted comma chu an dah ṭhin ngei a, a bung leh chang pawh an tarlang tel ṭhin. Chutianga an tih chuan Bible thu kha dik takin an dah ṭhin thung. Amaherawhchu, ZNP hi chuan anmahni duh angin Bible an kailek a, chu an kaihlekna chu dik ni awm taka lantir tumin inverted comma dahin, Bible bu, bung leh chang nen meuh an tarlang a ni.

Hei hi chu thil kalhmang tur niin a lang lova, kan Pathian thu zah lohna pakhat a ni. Chuvangin, ZNP hian he thu hi an la tar zel duh a nih chuan siam ṭha ngam se ka ti ngawt mai.

Tin, siam ṭha tur pawhin ka ngen nghal bawk a ni.

- H. Lalchhandama