Sum neih loh hi India huap a ni

Politics lama inbeihna remchang zawngtu mi ṭhenkhatin kan Chief Minister chu, "Sum nei renga insawi a tak taka sum nei si lo, mahni hnathawkte hlawk pawh puk chawp duh," tiin an han sel bawng bawng ṭhin hi a chhiar tlem thlak lulai deuh chuan a lang. 

Tunah hian Mizo­ram chang ni lovin India pum hi Covid-19 hian a rûn avangin pawisa nei lovin a buai a, hmasawnna tura pawisa dah hran sate chu hri dona hmanrua atan pawh pen a ngai a, India chang pawh ni lovin khawvel ram dangte pawh an buai laih laih a, MNF sorkar beihna atana lo hman ṭalh tum hi chu sim a hun tawh khawp mai.

Sum harsatna hi India huap a nih vang tak mai hian sorkar pawhin kal pui dan tur hi a hre thiam bik lo niin a lang a, a pawisa zat a hre lo pawh ni lovin a sawi duh lo a nih ka ring zawk. A vang chu mahni pawisa neih zat chu a tlem emaw a tam emaw kan hre ṭhin a, kan Chief Minister pawh hian sawi chhuah kher a ṭul a ti lo a ni ve mai a, suma harsatna thleng mek ta mai hi India ram pum huap buaina a ni tih hi lo hre hmasa phawt tawh ang u.

Tin, hriat chian leh atana ṭha deuh pakhat a la awm a, chu chu kan MLA-te naupang inkhualtelem anga an kal dan nuihzat thlakzia hi a ni bawk; chu chu pawisa thawh hnem zawk nih an inchuh vel lai bawr hi a ni. 

Congress MLA-te an fing (phakar a tel deuh) ber a, ZPM MLA te an che â ber a, MNF MLA te tan chuan pawisa dapna a la tama buaina tur a awm lo. Congress thang kamah ZMP MLA te an âwk a, "Pawisa thawh lamah chuan Congress-in an thawh tlem ber," tiin thu naupang chhia tak tak an han chhuah zui a, tin, tun ang boruakah chuan Chief Minister chu ni ila ka thla khat hlawh 100% hi ka pe hmak ang, chu mi fill up na tur pe chak hi contract a pek chhuah zingah hian a za tel an awm dawn a ni. 

Sum neih loh thu sawi hreh ber kan CM chuan a sawi a ngaih tak avangin sorkar hnathawk hlawh lo hman lâwk (puksak) a ngaih thu a puang ra rup mai a, hei hi sorkar hnathawk tan, 'Kan phal lo,' tih theih a ni lo; a chhan chu pawisa petu chu sorkar a ni zawk tlat. Sorkar hnathawk hlawh sorkar in a puk hi fiamthu lama, "Kan awmpui nu hlawh hi kan rin ber a ni, kan khawsak a harsa lutuk," a tih kha kan hre chhuak zawk! 

He boruak kal mekah hian kan Minister ṭhenkhat hi an insum a ngai deuh a ni. Chhim lama zinnaah SEDP sem a nih tur thu puang leh pawisa dah vek a nih thu lo sawi te leh sports atana pawisa tamzia lo sawi Minister kan nei tlat mai a, sawi hun lo tak a ni - sorkar hnathawk hlawh kan puk lai hi chuan. Chutih mek lai chuan Zoram mipuite pawhin suma harsatna awm mek hi Mizoram harsatna ni lovin, MNF rorel thiam loh lam ni lovin India ram pum harsatna zawk a ni tih kan hrat a ṭha. 

Mzoram mipui pawh zah zo lova BJP lama ṭanga CAB vote puitu state meuh pawh pawisa min pek tur an nei lova, India pum hi kan buai zawk tih hi kan hrethiam tlang tawh dawn a nia.