Revd hua hua chu in ni mai

Mizo Pastor huai­sen Revd Chuau­ṭhuama a ṭawng chhuak a, biak in lam aiin political party office lamah a sawhkhawk a na deuh a nih hmel. Tun thlengin social media khawvelah chuan KṬP General Conference kha a la ṭiak hleithei lova, KṬP over tawh rualin kha thupui sawi huaisen tak mai kha an la sawi chhawng a ni. Kha thusawi kha "A hua hua chu in ni mai" ti ila a fel vek mai a ni.

Revd Chuau­ṭhuama hi lehkha­thiam säng tak leh thil chik mi a nih piah lamah a sawi duh chu sawi ngam mi niin ka lo hre ve a, hei vang hian a Pastor pui zingah pawh läwm vak lo an awm an ti.

Committee mee­ting lamah pawh a duh zawng leh duh loh zawng huaisen taka sawi a, mi hmai zah avanga sawi tur thup ve ṭit ṭet lo a ni a, an sawi zel dan chuan Synod rorel inkhawm pui ah meuh pawh huaisen taka duh elh duh loh sawi ngam a ni.

Nilai leh Beihrual Thupui a sawi pawh an hal rap rap tawh avang khan sawiselna naran chu dawng zo tak turah hn ngai ve ringawt ila. Chumi hre lawk sâ chuan KṬP General Conference ah pawh khan huaisen takin a duh leh duh loh zawng kha Pathian leh Mizoram hma­ngaihna avangin a sawi chhuak ta a ni.

Chu a thusawi chu a mizia ang ngeiin a chang chuan a sawi hriam lutuk a nih pawhin political party mal anga lo helh chi niin a lang lem lo. Party Press Release hmanga lo chhan leh do chi a ni lova, politics thil sawi a ni chung khan party politics sawi a nih loh avangin huata lâk tur a ni lovang.

Siam ṭhat duhna thinlunga thusawi lo huat em em leh lo beih let hi neutral thinlung hliamna hmanrua a ni.

Mizoramah political party mi leh sâ tamna hmanga a mala Sorkar thei an awm lova, neutral hawi lam apiang zel hi an chak ṭhin an ti hi a nih si chuan, Revd Chuauṭhuama thusawi beih let leh sawisel hi mahni thlan laihna a ni thei a, political party pawhin an worker te an khap zawk tur a ni.

Revd Chuau­ṭhuama "Tun lai thil awmzia" thu kha a hua in awm chuan, a hua hua kha in ni mai, tih hi neutral thlirna a ni dawn a lo ni.

- Lalnuntluanga