KAN SORKAR DAWN

Kan ram hruaitute hian engemaw an tum a, hun leh tha senga nitin Party office-ah an hun ṭha zawng zawng an khawhral ṭhin chu le? A chhanna mawlte chu- sorkar an tih hi a ni.

ZNP President Pu Lalduhawma’n tlang takin hei hi a sawi a. “Keimahnia (Kan Party) kan sorkar loh pawhin sorkarah kan tel tho tho dawn” tiin Party member-te thlun beh tumin a bei reng a. Pu Lalduhawma hi nuihzat thei tur kan awm lo. Hruaitu ṭhenkhat chu an awmna Party-ah Assembly inthlanna lo awm turah ticket chan loh an hlauh avangin Party dangah an pakai a. Ṭhenkhat Party lianten an lo zakzeh thei mahna tiin an fukna zar an sawn mek bawk a.

Mahatma Gandhi kha a thiltumah a chiang a, a thil tum a hmuh theihna tur a hmanrua pawh a duhtui viau. Kumpinu sorkar awpbehna aṭanga India a zalenna atan a bei a. A hmanrua atan Ahimsa (Non-Violence - tharum tel lo) a thlang a. “Tharum thawh ai chuan zalenna hmuh loh pawh ka duh zawk” a ti hial a ni. Gandhia hian India zalenna atan a hun leh tha, a thiamna leh finna zawng zawng a hmang a. Ram zalen awm dan tur a rilrua mitthlain a thlir a. Lal Isuan, “Khandaih hmang­tute chu khan-daih bawkin an thi ang” a tih hi a ngaihtuah phak niin a lang.

Kan ram hian Gandhia anga hmathlir (vision) nei ṭha kan mamawh. Juda lal fing leh ropui ber Solomona chuan, “Inlarna (vision) a awm loh chuan mipuite an boral ṭhin” a ti a. Vawiina kan khawtlang nun hi eng angin nge kan hmuh? Rev. Dr. Lalsawma chuan, “Neihbawiha Discipleship Thraining Centre kum 8 ka enkawl chhunga ka thil hmuhchhuah chu: Mizo hi kan lo va ho ta em! tih hi a ni” a ti a. (Hei hi FLAM-in Seminar on Peaceful Revolution an neiha a sawi a ni) School Headmaster pakhat chuan, “Tun lai naupangte hi chu an zaktheilo hle a, an luhlul em em a, aia upa zah derna pawh an nei tawh lo” a ti bawk.

Heng hruaitu pahnihin an tawnhriat an sawi hi vawiina kan khawtlang nun hian ‘a dik a ni’ tiin a nemnghet a ni. ‘Ho’ chu pawnlang, zung nei lo, takna leh tum nei lo a ni. Miho chuan a damchhan a ngaihtuah ngai lova, thil tum mumal a neih loh avangin a thatchhia a, a rethei a, a tladah ṭhin.

Nikum Chapchar Kut kan lawm zana Assam Rifles lammual thlanga hmeichhe kekawrte leh pheikhawk khing lehlam engemaw zat an chharte kha mi pangngai ta ni lovin, mihote hnutchhiat a nih kha. Darkar hnih khat nawmchenna atan heti khawp hian kan che nawmnah thei a nih chuan kum nga (MLA Term) chhung nawmna atan phei chuan lei leh Van ak tih khawpin kan che phuai duh ngei ang le!

Heti khawpa kan lo tladah tak chhan hi Solomon-a chuan hruaituten vision an neih loh vang niah a ngai. Zep nak emaw, kan ram hruaitute zingah ram tana ngaihtuahna hmang tak tak an awm lo va. An tum ber, ‘dream’ chu MLA thlannaa tlin a, intih hausak a ni.

Hei vang hian inthlan­naa tlin theihna tur a nih phawt chuan eng hmanrua pawh an hmang duh a. A thlawna pawisa leh thil dang semte hi miretheite rilru tih sawngnawi sak vekna a ni tih haiderin itawm takin an tawktarh ṭhin a nih hi.

Lung, chhanga chan­tir thei, mahse chan­tir duh tlat si lo, khaw­vela thuneihna leh ropuina zawng zawng a thlawna dawng thei, mah se a chhiatna tur a ni tih a hriat avanga dawng duh tlat si lo, Isua zuitute hi kan ṭhanharh a va hun ta em!

- M.C. Lalrinthanga