TUNLAI KAN BUAINA PAN CARD LEH PAWISA

Hmanni khan WhatsApp-ah, “PAN card hi income tax châwi turte tân chauh a ni, neih chuan income tax châwi a hlauhawm. Form 60/61 hi a tih vel buaithlak zawk mah se tih hrâm hrâm tur; Tribal kan nih angin kan rights chuti khati,” tih a lêng vêl a. “Form 60/61” tih hma lam zawng khi a dik lo, PAN card hi income tax atan chauh a ni chiah lo. “Mizoramah bank-in PAN card an demand ngawt thei lo” an tih pawh kha a dik, eng bank mahin an phût lui lo ang.

Mizo-ah hmân aṭanga PAN card nei an tam mai, Mizorama eizawng na na na income tax an châwi thu kan hre lo. Income Tax Act 1961, section 10(26)-ah chuan a âwlna tur ram mi dik tak (belongs to a community eligible for this exemption) nih a ngaih mai bakah, chumi ram ngêia eizawng (employed in any of the North East states of India) nih a ngâi bawk. Mizo kan niha Mizorama ei kan zawn bawk si chuan income tax châwi a ngâi ve lo; PAN card neih leh neih lohin khawlh a kham lo. Income tax châwi theihna rama âwm pawh ni ila (a lem lemin), kan kum khat sum lakluh Rs. 2,50,000/- aia tam a nih chauhin tax kan châwi ang; chu pawh chu a chhût dan tê tê a la awm neuh neuh a; hetia mawlmang deuha sawi mai hi a tâwk, kan châwi ve tak tak dâwn chuang si lo.

"Form 60/61 hi fill up hram hram ang u," tih taka hi sawi chian a ngai. PAN card nei lo tan chuan tih âwm tak a ni. Form 60/61 fill up hian pawisa dah luh leh lâk chhuah kan tih theih phah; mah se tih dawn apiangin buaipui a ngai ziah. Chu mai a ni lo, ATM card hmanna ang chi khâwl rêng rêngah eng mah awmzia a awm lo. Card hmang duh tan PAN card leh bank account link loh chuan Form 60 update hian kawngro a su lo. “Kan rights hi kan hriat a pawimawh. PAN card hi neih loh tur,” tih hi khâwlin a hriatthiam miau loh chuan engtin nge kan tih ang le! Thluak nei ve lo napui chu khin ûr ûr chi a ni si lo. ATM card kan hmang duh a nih chuan PAN card neih mai hi a fuh ber niin a lang - tun dinhmunah chuan.

Hman nîah nu pahnih hian, "PAN card ka submit chuan tax châwi ka hlau sia, WhatsApp-ah khan an sawi vek sia," an ti a; "Ka pi, Tribal i nih vangin leh ram hnufual, Mizorama ei i zawn vangin income tax i châwi ve thei lo; ring lo mite khawngaihna zârah kan hlawh a zavaiin kan hâwn thei a ni," ka lo ti a. Ngaih ngam takin PAN card chu an submit ve tâk kha! Mi thuziah finfiah loa ‘copy-paste’ ching kan tam lutuk hi tunlaia kan buaina ber a ni (copy-paste tih thumal duk dak lo hi ni dangah kan la sawi ang).

Eng pawh ni se, Sapi’n office an tih, eng ṭawng emaw ni entawna media-ten ‘pisa’ an tih ve rikngawt, ‘sawrkar hnathawkte chawlh hahdamna hmun’-a thawk kan nih chuan PAN card neih a ṭhat hmêl e; PAN card hman ngei ngeina tur thil dang kan tawn palhin, PAN Card kan neih si loh chuan kan nui sîng sêng lo palh ang e.

- Rempuia R. Lûtmâng