V day vanga V loh a awm thei!
Hman deuh aṭang khan Valentine's Day hi kan ngai thupui ta fu mai a, ṭhangtharte phei chuan thil tak tak emaw an ti mai dawn. Inven a ngaih avangin tlema zawng sawi zui ve deuh a ṭul ta a nih hi.
Ṭhangthar lam chuan 'V Day' an ti mai a, an hrethiam em em a, February 14 hi a background hre vak lote pawhin 'inngaihzawn ni' emaw 'ngaihzawng neih lantir ni' ang deuhin an ngai a, an phe suau suau mai a, thil lem leh phuahchawp, mi sumdawnna chi khat ang lek a nih dan hi an hrethiam si lo.
Saint Valentine-a tihchhuah a nih dante pawh sawi dan a inang lova, mi thianghlim Valentine-a ni bik kan hman dan hi a bawlhhlawh ve tawlh tawlh avang leh, ṭhangthar lung mawl ve deuh deuhin 'engkim a thiang hemi niah hi chuan' an tih lohna turin nu leh pate hriat atan tal kan ziak ang a, a mamawh tur Mizo ṭhangthar hi chuan an chhiar tlem si a, nu leh pa talin i hrilhfiah teh ang u.
Heng ni hi a hlawk pui ber chu card hralhtute leh gift item ang chi siamtute an ni a, hengho hian a nasa thei ang berin an tilar ṭhin. Kum khata ni 365 inngaihzawn theih na na na kha ni khat chhunga chinfel mai an tum a, he ni bika thilpek inpek tawn ngei ngai a ngai angin an han bawl phuan a, puk chawp pawhin perfume, tlereuh, thawmhnaw etc an inleisak ṭhin.
A hlawkpuitu dang leh chu restaurant neitu lam hi an ni a, inngaizawngte chuan he mi ni hian thil ei dun kher tur emaw an ti ṭhin. Party huaihawttu, picnic spot leh resort neitu lam tan pawh he ni hi an 'Krismas' ve ang deuh a ni a, anni tan chuan buh luchuh hun a ni ve tlat. Tunah chuan khawpuia catering tiho hian an hlawkpui leh a, ṭhianhoa chaw ei khawm etc an uar mek ta bawk.
'MAHSE' ka unau... hetianga phi ruai hi mi tlem te chauh an ni. Hetiang ti ṭhinte hi chu mi tlem te tak tak an ni. Mi pangngai chuan an thlir liam mai mai a nia, chaw tak khukin lo khukpui duh suh. I nun dan pangngai hloh phah suh. An chet tlat dan Facebook, Whatsapp ect velah an thehdarh a, tleitrawl a deuh chuan henga kal ve lo hi 'changkang lo' emaw an inti a, tleirawlin chhuah an chak phah a, an za cheng mai. An chhuak a, an chet tlatna kan hre zui tawh ṭhin lo.
Mi tam takin V Day avangin an thianghlimna an hloh a, an ''V 'zui loh phah a, hun hrehawm tak an hmang zui ṭhin. V Day hi ni 365 zinga ni khat mai a nih avangin fimkhur taka hman liam chi a ni a, atchilha phul pui chiam tur chi a ni lo.
- Mr T