Party hawi lam ka rin hriat
Tun hnaia Mizorama thil thleng leh political party-te che vel ka en hian, ka nuih te a za deuh rum rum a, hman ni lawka kan hawi lam leh tuna kan hawi lam chu a dang leh ta tih hmuh hmaih rual a ni lo. A bikin ZNP che vel en hian an beisei angin thil a kal lova an ze ngai an chhuah leh a ang ka ti.
Thil chik mi i nih chuan ZNP hian tlem lai deuh aṭang khan Congress aiin MNF an bei nasa zawk tih i hria ang a, a chhan chu ZNP hi ‘survival’ ngaihtuah party an ni a, MNF-in mal din an tum thu an puan hnu kha chuan an survive theih dan chu Congress nena thawh dun chiah a ni mai. MLA nei lo mahse opposition party ve ta chuan an thusawinaah ruling lam an bei tura rin a nih laiin ZNP chuan MNF bawk an bei leh ṭhin a, Congress an beihna pawh en ila MNF an hmer tel deuh zel a ni.
Tichuan tun hnaiah hian ZNP lam hian Congress chu a mu puiin an sai leh ṭan ta. Congress chu hleihluak takin an bei leh ta mek a, hei hian ZNP hawi lam hi a tichiang chho tawlh tawlh ang. ZNP hian Congress nena thawh dun an tum zet a, an beisei ang an hmu lo a niin a ngaih theih a, engpawhnise politics a nia engkim hi a thiang vek tho a ni.
Tuna ngaihdan awm ta chu MNF hian ‘mal din’ an han inti ngawt a, a tawpa tawpah chuan BJP hi an insuihzawm pui mai awm mang e aw, tiin a thlir theih a. Inthlan dawnah chuan pawisa thianghlim emaw thianghlim lo emaw hi mamawh a ni tho tho dawn a, Election Commission pawhin hman phal zat a nei a, chutiang pawisa chu BJP hian an ngah em em mai a, anni thawhpui hi a hlawk dawn a ni. BJP hian chhim lam bial hnih khat, Mamit district bial leh Kolasib District bial pakhat hi an vil ve deuh chawt a, hengte hi MNF-in an sem ṭhen theih chuan an thawh dun mai rinna hi a lian tawlh tawlh a.
MPC hi chu hriatthiam harsa tak an la ni reng a, anni hi tlinna tura ṭangkai lo anga sawi an awm pawhin an do tur lama ṭang tur chuan an duh dawn lova, MPC hi ‘deciding factor’ nih theihna bial tam takah an la nei a, chuvangin anni pawh hi hmuh hmaih theih an ni chuang lo ang.
Ṭhuang pathum - Congress + ZNP; MNF + BJP leh MPC leh pawl hrang hrang inzawm khawm tih anga lang kha tunah chuan ZNP dinna hi a hriat tawh loh a, MPC-te nen an inhlawm khawm leh nge nge dawn nge MNF bawk an bel leh dawn tihte ngaihdan a la awm a, tun dinhmunah chuan sawi chian theih a la ni lo.
- Lalrinchhana Chhangte