Central KṬP khawmpui lian vawi 59-naa Pastor pahnihte thuchah kha

Kum 2022 Central KṬP Khawmpui lian vawi 59-naa Pastor pahnih Rev. K. Lawmzuala leh Revd. Chuauṭhuama ten Pathian thuchah an sawi chuan titi a titam hle. Revd. Chuauva thusawiin sawi zui a hlawh zual.

Khawmpui thupui ber leh a sawitu turte reng reng hi a hma feah Synod hotuten uluk takin an ngaihtuah lawk ṭhin. Chuvangin, Revd. Chuauṭhuama thuchah pawh hi Mizoram Synod thuchah tiin sawi ta mai ila kan sawi sual lovang.

Mizoram Synod hian sorkarna chelhtu political party tana huat theih tak tak tur thu chhuah leh pulpit tlang aṭanga sawi an nei fo tawh a, a inngaihbeltu party te pawhin an chhiatpuiin an lo tlak phah zel bawk. A thui lutuk loh nan a ni leh thla leh kum te chu tar lang vek lo ila.

People’s Conference Party, Brig. T. Sailo sorkar lai khan Synod hian, “Corruption do kum” a puang a. Opposition party te chu kan lawm hle a, Congress party phei chuan sorkarna a lak phahah mi tam tak chuan an ngai. Hla phuah thiam pakhat khan, “PC kan ram budget ei zotu, sirah hnawlin Congress-ah lo tel ve rawh...” tih a phuah a. Pu Lalthanhawla leh a hote chuan Congress Party flag nen khaw tin leh tlang tinah kan sa a, kan lampui mup mup ṭhin a ni.

Tichuan, MLA thlanpui kan nei a, PC sorkar a tla a, Congress Party sorkar Pu Hawla hruai a lo ding ve ta a ni. Kei chuan Brig. T. Sailo sorkar a tlakna bulpui ber chu Pu Laldenga hruai MNF rawt chimit a, Pu Biakchhunga hruai MNF te tun din a tum vang kha ni ber zawkin ka hria.

Tichuan, Pu Lalthan­hawla hruai Congress sor­kar chu a lo ding a. “PC kan ram budget ei zotu titu kha Mizoram budget ei zotu zawkah Mizo­ram mipuite chuan ngaiin Synod neitupa nia ngaih, Rev. Dr. Zairema leh Pu Bualhranga, Ex-MLA ten Mizoram CM Pu Hawla chu India ram Court rorelna sang ber Supreme Court thlengin an khing ta a. Heng avang leh chhan tam tak avangin Pu Hawla leh a hruai Congress Party kha MLA thlanpui 1998 khan ke van vawr ṭhawtin kan tlu ta a ni.

Kum sawm opposition-a Congress party an awm hnuah sorkarna chelhtu Pu Zoramthanga hruai MNF party pawh kha Corruption leh compensation uchuak tak tak avang khan a hmingchhe ve leh ta a, MLA thlanpui kum 2008 a lo her chhuah dawn chuan Pu Hawla chuan, “Ka sual ka sim ang a, eirukna ka tibo ang a, corruption chu a zung nen ka pawt phawi vek ang a, ka pho ro ang,” tia mittui, hnap tui nen a ṭah meuh chuan Zoram mipuite chuan Congress Party kaitho lehin MNF party chu Bial 40-ah bial 3-ah chauh a tling ta a ni.

Tichuan, Pu Hawla chu kan CM a lo ni leh ta a, CM atana lakluh a nih ni khan chanchinbu mite chuan phur em emin, “Ka pu, engtin nge corruption chu i tihrêm ang...?” tia an zawhna chu Pu Hawla chuan, “Lalthanhawla ngai reng kha ka ni a, ka kum a upa deuh a ni mai, sual sim tur engmah ka nei lo, corruption-ah ka fihlim a, MNF-in kum 10 chhung min chhui a, engmah an hmu lo...” tiin a chhang a nih kha.

Eiruk, Corruption tihbo chu sawi loh; a zual zapui vailenhlo tih chu nepte a nih kha, chu mai bakah Kohhran huat ber zu a zuar leh ta a, kan Synod pastor leh Kohhran Upa tam zawkte chuan pulpit tlang leh mitthi vuinaahte zu zawrh an duh loh thu leh an do thu an au chhuahpui ta deuh zel a, kha tih hunlaia thu khal tak tak leh chanchinbua zu duh loh thu ziak tam ber Pastor zingah chuan Revd. Chuaua hi a niin ka hria. A thuziak tuipui leh vawrh darh nasa bertu pawh MNF party kan ni tih ka chiang hle bawk.

Kohhran, pastor leh rawngbawltute tan zu leh a zuartu an duh loh avangin kum 2018 MLA inthlanah khan Congress sorkar paihthlak niin MNF party hi a lo sorkar leh ta a ni ti ila a dik thei ang. Congress hotute pawh khan zu zawrh sawiseltute kha an haw hle a ni. Mizoram rorelna sang ber Assembly-ah te pawh an sawi kha, ‘Pastor leh Kohhran Upa zu in pawh ka hria,’ tih te, ‘Pastor leh rawngbawltute pawh hian pulpita thu an sawi hmain zu peg hnih khat in hmasa se la, thu pawh an sawi tluang deuh ang’ etc...Pu Hawla phei chuan, “Zu kan zuar ta hi Kohhranho ṭawngṭai chhânna a ni e,” a ti a nih kha.

Revd. Chuauṭhuaman KṬP Inkhawmpui liana a thusawi hi rorel lai MNF party tan chuan inngaihbel loh theih a ni lo a, Congress party nen a hmer kawp a ni tih pawh a chiang hle. A chhan chu kum 34 deuhthaw roreltute a tih avangin MNF leh Congress party lo chu a huap thei lo. Kei chuan huatthua la lo a, insiam ṭhat nan hmang thei ila ka duh a. Chu mai bakah Revd. Chuauṭhuama hian dâwt leh thu dik lo a sawi awm reng reng ka hre lo, thu dik tak vek a sawi niin ka hria.

Hetiang taka kan Synod puipaten hriatthiam theih tura MNF leh Congress party an hnawl a nih chuan ZPM party chu a lawm ber tur leh hlimpui ber tur awm pawh an ni. Sorkar pawh an sorkar phah mai thei. Mahse, hei hi ZPM te hian hria se ka duh, Chief Minister atana an ruat lawk Pu Lalduhawma hi ama mimalah beiseina leh rinna Zoram mipuiin an neih vang chauh a ni a, a hote hi chu Pu A. Thanglura'n MNF party ding tir a deuhsawhna ṭawngkam chhuak, “Pu Laldenga zuitute khi suamhmang pûka fatu âwm tawk zek zek an ni e...” a tih ang deuhin Pu Lalduhawma hnung zuitu tam zawkte pawh hi, MNF leh Congress hruaitute aia mi fel leh ṭha bik ni chuang lote in ni tih a hrechiang tawhtute chuan kan chian em em che u a, hruaitu thar, chak leh huaisen Pu Duha'n Zoram mipui hmaa a sawi leh a tiam anga a kalpui chuan kan ram tan beisei a la awm em ang chu an ti a ni tih in hriat a, chutiang tumna leh tih tak tak in neih ngei a ngai a ni e.

- MC Lalrinthanga