Pawl 10 pass zirlaite tana thurawn

Nimin piah lawk khan Mizoram Board of School Education chuan High School Leaving Certificate result a tichhuak a, zirlai tamtak chu lawm avangin an mittui a tlak laiin ṭhenkhat erawh an indawm kun thung. Kumtluana in thawh rah in seng kan tih rual hian mimal, chhungkua leh thil dang vanga hlawhtlinna chang zo ta lo pawh sawi tur tam tak in awm tih kan hria e.

Hripui leng karah school kal ṭha mumal loa board exam hmachhawn in ni a, sawinep pawl an awm laiin a harsa zawnga sawi pawl pawh an bang lo.

Engpawh chu ni se, zirna kawnga in kalkawng chhuk chho zawh turin theihtawp chhuah zel turin duhsakna kan hlan a che u.

Tun aṭanga kum 5-10 inkar hi in hmalam hun hriltu a ni thei tih hriain, in tlukchhiatna bul ni loa khawtlang leh ram tana mi puitling; khua leh tui ṭha ni tura rahbi pawimawhah siam turin ka ngen a ni.

Arts, Commerce, Science etc. eng line pawh thlang u la, thih tha tak meuh meuha inbeih chhoh a ngai dawn tih hre reng chungin hringnun hi in hmang dawn a nia.

Mizoin hna ṭha kan tih hi kan hnawh khah zel avangin sorkar hna hi a vang chho zel dawn a, mithiamte rawn chunga tum mumal tak neia in zirchhoh hi a ṭul tawh hle a ni.

Nu leh pate pawh­in kan fate kalna awm kawnga kan ngaihah chuan kan phak ang tawkin ṭanpui ila, tun aṭanga plan mumal tak lo siamsak hi nu leh pa fing leh hnam changkangte tih dan a ni.

Infiamna, kut themthiam bikna nei, ran enkawl lama tuina leh thiambikna nei an nih chuan kal tir mai hreh lo ila, kan tuina zawngah keini aia thiam rawn hreh lo ila, hei hian thiam tumna rilru nasa zawk min pe dawn a, hlawhtlinna in a rawn zui duh chawk bawk a ni.

Nawmsakna kher um loa an nuam tih zawng thawh tir tura tun aṭanga kan kaihhruai hian nakin lawka an rilru hahna tur tamtak chu kan lak kian sak thei dawn a ni. Ram ṭhang­laia cheng kan nih avangin ram chang­kang zawkte din­hmun hi zirlai tam zawk chuan kan thleng pha vek dawn lo a, chuvang chuan kan phak ang tawka a sang ber thleng turin zirlaite duhsakna ka hlan a che u.

Ti thei a in ngai ten an tum ram an thleng ṭhin a, ti thei loa in ngaite chuan an thleng lo chawk. Pathian kuta tluk luh hi a hahdawmthlak a, kan tum kan thlen zawh tak loh pawha lungawina min pe tu a ni.

- J Hnamte