Hnam ropui Mizote

College kan kal lai khan kan ṭhianpa pakhat chuan an college Fresher's Social-ah kal ve turin min sawm a, college dang daiha kal ni mah ila min sawm takah chuan tiin ka kal ve a. An Students Union Vice President chu thusawi turin a rawn ding chhuak a, sap ṭawnga bul a ṭan hnu chuan "Hnampui ṭawngin ka sawi tawh mai ang a" tiin Mizo ṭawng chuan a thusawi chu a chhunzawm ta a ni. Mizote hnampui anga a chhal mai kha fiamthu thawhah chuan ka ngai lo nain thu takah pawh ka ngaihsak lem lo bawk. Mahse tun hnua ka ngaihtuahnaa awm chhunzawm ta chu - Mizote hi nakinah chuan khawvel hnam ropui berte zinga mi kan la nih ngei ka ring ta. Chu ka rinna chhan chu kawng thum lek sawi ka duh a.

1) Kristian kan nih avangin: Tunlai huna khawvel hnam ropui tak takte hi 'Kristian ram' tia sawi theih an ni deuh vek a, ram ṭhang mek zingah pawh Kristian nasa takin an pung mek. Ram hausa zinga chhiar tel hlawh ngai lo, tun hnua Super Power ni ve mai thei dinhmuna ding mek China pawh hi khawvel hian a en liam mai mai thei ta lo. Napoleon-a chuan 'There lies a sleeping giant. Let him sleep! For when he wakes he will move the world' a lo ti a, hei hi China ram a sawina nia ngaih a ni.

Heti taka China a ṭhang duang ta em em mai hi a chhan tawi tea sawi dawn chuan an ram economy san tak em vang a ni a tih theih ang. Hetih rual hian Kristian an tam tawhzia erawh kan hmuh hmaih a thiang bik lo ang.

Nepal tih lohah chuan za zela chhutin Kristian pun chakna ber ram a ni mek a, mah se Nepal ram aia a let engemaw zata mihring an tam avangin a tak takah chuan Kristian pun chak berna ramah kan chhal thei ang. Prof. Fenggang Yang, Director of the Center of Religion and Chinese Society, Purdue University ami chuan thil thlen chhoh dan aṭanga chhutin kum 2030-ah meuh chuan China hi khawvela Kristian tam berna ram an nih a ring hial a ni.

Keini pawh `zaah za Kristian ram' tiin kan inchhal a, a mawi a ni. A tak takah chuan kan ni chiah lo tih kan hria, mahse Zo hnahthlak ngau ngau hi chu Mizoram pawna awmte nena chhut tel vek pawhin zaah za chu kan tling thuakin a rinawm tho tho.

2) Inkhawm nasa hnam kan ni : Kan inkhawm tamzia kan sawi hian a ṭhatna lam aiin kan inkhawm tam ang hua kan pawn lam nuna a lanchhuah tawk lohzia thu hi kan auchhuah pui ring zawk em aw a tih theih. Ṭhahnemngaihna rilru aṭang chuan thil dik tak pawh a ni awm e. Mahse kan entawn atana an chanchin kan sawi

ṭhin ramdanga kan Kristian puite hian Mizoten heti taka Pathian biakbuk thianghlim kan pan nasatzia hi mak an ti ve viau hian ka ring ṭhin.

Kar laklawh chu sawi loh, Pathianniah chauh pawh vawi thum ngawt Kohhran inkhawm neih theih te phei hi chu ropui deuh a nia; sap ho kan ngaihsan tak takte zingah pawh hetiang ti thei hi an awm ve ang em? Nun tak tak nei lo engemawzat chu kan awm mai thei, mah se kan inkhawm tam mai bakah inkhawm apianga mi engemawzat inkhawm tur kan la inhmu thei rengte hian Kristianna kawnga kan tih tak takzia a lantirin ve pakhatin ka hria.

3) Chanchinṭha thehdarhtu kan ni : 'Thu/ siam chhuah hmun danga thawn chhuah tur nei lo mah ila Chanchinṭha kan thawn chhuak' tia ṭhenkhatin an sawi te hi naupang inkhuatelem ṭawngkam mai mai anga ngaih chi ni pawhin a lang lo. Economics & Statistics Department-in a tihchhuah hnuhnung ber, Statistical Handbook 2014-a a lan danin Mizorama Kohhran lian zual 9 te Missionary tirhchhuah zat chu 2985 a ni a, chu chu chhiarpui hnuhnung ber aṭanga chhutin mi sangkhat zelah mi pathum vel missionary turin kan chhuak tihna a ni. Kohhran pawl dang engemawzat tarlan tel a ni lo lehnghal a; heng bakah mimal leh Para Church te chetvelna nen chuan hei ai hian a la tam fe dawn tihna a ni.

Hnam ropui kan nih chhan tur hi Politics thlirna aṭang pawhin thil tam tak sawi tur chu a awm ang a, a hmanrua zinga mi pawh a ni. Korean Kristian te ṭawngṭai nasatzia leh an ram changkan tawhzia khawvelin a hmu a, sapho nunphung dahlau tawhzia kan sawi rualin Pathian tana mi takzet an la tamzia leh an ram ropuizia kan la sawi bang thei chuang lo. Heng zawng zawng thlir hian hnam ropui kan nihna tur lungphum chu ringtu kan nihna hi niin ka hria.

`Pathian zawn chhuah' tia inchhal ngatte hi Pathianin khaw­vel hnam ropui zinga chhiar tel theih tura min la hun chhuah hi a phalin ka ring tlat a ni.

- Mesak Lawmkima, Khatla South